அடித்து துவைக்கப்போகும் கனமழை.. வேலூர் டூ கன்னியாகுமரி வரை 30 மாவட்டங்களுக்கு ஆரஞ்சு அலர்ட்

சென்னை: தமிழ்நாட்டில் அடுத்த 5 நாட்களுக்கு கனமழை பெய்யும் என்று சென்னை வானிலை ஆய்வு மையம் எச்சரித்திருந்தது. இந்நிலையில், அடுத்த 2 மணி நேரத்திற்கு 30 மாவட்டங்களில் கனமழை பெய்யும் என ஆரஞ்சு அலர்ட் விடுக்கப்பட்டிருக்கிறது.

ஜூலை முதல் வாரம் வரை தமிழகத்தில் வெயில் வாட்டி எடுத்த நிலையில், அதன் பின்னர் பருவமழை தீவிரமடைய தொடங்கியது. தென்மேற்கு பருவமழை மத்திய இந்தியா வரை உள்ள நிலப்பரப்புக்கு ஆண்டின் மொத்த மழைப்பொழிவில் 70%ஐ கொடுக்கும். இதனை நம்பி கோடிக்கணக்கான விவசாயிகள் இருக்கின்றனர். ஜூலை இரண்டாவது வாரத்தில் தொடங்கிய தென்மேற்கு பருவமழை தற்போது முடிவுக்கு வந்திருக்கிறது. தமிழ்நாட்டில் இயல்பை விட 19% கூடுதலாக தென்மேற்கு பருவமழை மழையை கொடுத்திருக்கிறது.

தற்போது வடகிழக்கு பருவமழை தொடங்கியுள்ளது. தமிழ்நாட்டை பொறுத்தவரை கடந்த அக் 1ம் தேதி தொடங்கி இன்று வரை 43% குறைவாக மழை பொழிவை பருவமழை கொடுத்திருக்கிறது. இந்த காலங்களில் ஒட்டுமொத்தமாக சராசரியாக 17.1 மி.மீ மழை பொழிந்திருக்க வேண்டும். ஆனால் 9.7 மி.மீ மழை பெய்திருக்கிறது. அதிகபட்சமாக திருபத்தூர் மாவட்டத்தில் 65.0 மி.மீ மழை பெய்திருக்கிறது. பெரம்பலூர் மாவட்டத்தில் இதுவரை மழை எதுவும் பதிவாகவில்லை.

தென்மேற்கு பருவமழையின்போது நாகை, திருவாரூர், மயிலாடுதுறை என ஒன்றுபட்ட தஞ்சை மாவட்டத்தில் மழை குறைவாக பெய்திருந்தது. ஆனால் இப்போது இதே டெல்டா மாவட்டங்களில்தான் மழை சூடுபிடித்திருக்கிறது.

இந்நிலையில் இரவு 8 மணி வரை 28 மாவட்டங்களில் இடி, மின்னலுடன் கனமழை பெய்யும் என சென்னை வானிலை மையம் எச்சரித்துள்ளது. இது குறித்து விடுக்கப்பட்டுள்ள அறிவிப்பில், “விருதுநகர், தென்காசி, மதுரை, ராமநாதபுரம், தூத்துக்குடி, கன்னியாகுமரி, திருநெல்வேலி, நீலகிரி, ஈரோடு, திருப்பூர், கோவை, திண்டுக்கல், சிவகங்கை, புதுக்கோட்டை, திருவாரூர், அரியலூர், பெரம்பலூர், தஞ்சாவூர், திருச்சிராப்பள்ளி, சேலம், நாமக்கல், கரூர், தர்மபுரி, கிருஷ்ணகிரி, திருவண்ணாமலை, கள்ளக்குறிச்சி, கடலூர், மயிலாடுதுறை, வேலூர் மற்றும் திருப்பத்துர் மாவட்டங்களுக்கு ஆரஞ்சு எச்சரிக்கை விடுக்கப்பட்டிருக்கிறது” என தெரிவிக்கப்பட்டிருக்கிறது.

மஞ்சள், ஆரஞ்சு அலர்ட் விளக்கம்: 64.5 மி.மீ முதல் 115. 5 மி.மீ வரை மழை பெய்யும் என எதிர்பார்க்கப்பட்டால், மஞ்சள் அலர்ட் விடுக்கப்படும். இதுவே, ஒரு நாளில் 115.6 முதல் 204.4 மிமீ வரையிலான மழைப்பொழிவுக்கு ஆரஞ்சு அலர்ட் விடுக்கப்படும்.

ரெட் அலர்ட் விளக்கம்: மக்களின் இயல்பு நிலை பாதிக்கும் வகையில் மழைப் பெய்வதற்கான வாய்ப்புகள் இருக்கும் போது ரெட் அலர்ட் விடப்படும். இந்த எச்சரிக்கை விடுக்கப்பட்டால் போக்குவரத்து, மின்சாரம், இணையம், மற்றும் தொலைத் தொடர்பு துண்டிக்கப்படுவதற்கு வாய்ப்புகள் இருக்கின்றன என்று அர்த்தம். 24 மணி நேரத்தில் 204.5 மிமீக்கு அதிகமாக மழை பெய்யும் போது ரெட் அலர்ட் விடுக்கப்படுகிறது.

English summary

Orange alert for 30 districts: (30 மாவட்டங்களுக்கு ஆரஞ்சு அலர்ட்) The Chennai Meteorological Department has warned that Tamil Nadu will receive heavy rains for the next 5 days. In this case, orange alert has been issued that heavy rain will fall in 28 districts in the next 2 hours.