விடியும்போது பனிமூட்டம்.. விடிந்த பிறகு படுத்தி எடுக்கும் வெப்பம்.. தமிழ்நாட்டை குழப்பும் வானிலை!

Updated: Tuesday, March 3, 2026, 16:00 [IST]

Subscribe to Oneindia Tamil

சென்னை: தமிழ்நாட்டில் கடந்த சில நாட்களாகவே குளிர் குறைந்து வெப்பம் தொடர்ந்து அதிகரித்து வருகிறது. இதற்கிடையே வரும் நாட்களில் மாநிலத்தில் காலை நேரம் பனிமூட்டம் நிலவும் அதே சூழலில் பிற்பகல் நேரத்தில் வெப்பம் அதிகரிக்கும் என வானிலை மையம் தெரிவித்துள்ளது. இது குறித்து நாம் விரிவாகப் பார்க்கலாம்!

தமிழ்நாட்டில் இப்போது குளிர் காலம் மெல்ல முடிந்து வருகிறது. மாநிலத்தில் பரவலாக வெப்பம் அதிகரிக்க ஆரம்பித்துவிட்டது. மார்ச் 1ம் தேதி முதலே பரவலாக வெப்பம் உயர்ந்து வருகிறது. இதற்கிடையே வரும் நாட்களிலும் மாநிலத்தில் வெப்பம் அதிகரிக்கும் என்றே வானிலை மையம் கூறியுள்ளது.

வானிலை

இது தொடர்பாக வானிலை மையம் வெளியிட்டுள்ள செய்திக்குறிப்பில், "இன்று முதல் வரும் மார்ச் 5ம் தேதி வரை தமிழகம், புதுவை மற்றும் காரைக்கால் பகுதிகளில் பொதுவாக வறண்ட வானிலை நிலவக்கூடும். வரும் மார்ச் 6ம் தேதி மேற்கு தொடர்ச்சி மலை மாவட்டங்களில் ஓரிரு இடங்களில் லேசான மழை பெய்யக்கூடும். ஏனைய தமிழகம், புதுவை மற்றும் காரைக்கால் பகுதிகளில் வறண்ட வானிலை நிலவக்கூடும்.

மார்ச் 7ம் தேதி மேற்கு தொடர்ச்சி மலை மாவட்டங்கள் மற்றும் தமிழக கடலோர மாவட்டங்களில் ஓரிரு இடங்களிலும் புதுவை மற்றும் காரைக்கால் பகுதிகளிலும் லேசான மழை பெய்யக்கூடும். ஏனைய தமிழகத்தில் வறண்ட வானிலை நிலவக்கூடும். மார்ச் 8ம் தேதி தென் தமிழகத்தில் லேசானது முதல் மிதமான மழையும், வட லேசான மழையும், ஓரிரு இடங்களிலும், புதுவை மற்றும் காரைக்கால் பகுதிகளிலும் பெய்யக்கூடும்.

பனிமூட்டம்

பனிமூட்டம் பற்றிய முன்னறிவிப்பு மற்றும் எச்சரிக்கையைப் பொறுத்தவரை இன்று மேற்கு தொடர்ச்சி மலை மாவட்டங்கள், தமிழக கடலோர பகுதிகளில் ஓரிரு இடங்களில் அதிகாலை வேளையில் லேசான பனிமூட்டம் காணப்படும். நாளை முதல் மார்ச் 5 வரை மேற்கு தொடர்ச்சி மலை மாவட்டங்கள், தமிழக கடலோர பகுதிகளில் ஓரிரு இடங்களில் அதிகாலை வேளையில் மிதமான பனிமூட்டம் காணப்படும்.

வெப்பம்

அதிகபட்ச வெப்பநிலை பற்றிய முன்னறிவிப்பைப் பொறுத்தவரை இன்று முதல் மார்ச் 6 வரை தமிழகம், புதுவை மற்றும் காரைக்கால் பகுதிகளில் அதிகபட்ச வெப்பநிலையில் குறிப்பிடத்தக்க மாற்றத்திற்கான வாய்ப்பு குறைவு, எனினும் சற்று உயரக்கூடும்.

இயல்பு நிலையிலிருந்து அதிகபட்ச வெப்ப அளவின் வேறுபாட்டைப் பொறுத்தவரை வரும் மார்ச் 6 வரை தமிழகம், புதுவை மற்றும் காரைக்கால் பகுதிகளில் அதிகபட்ச வெப்பநிலை இயல்பை ஒட்டியும்/இயல்பிலிருந்து 2-3° செல்சியஸ் வரை அதிகமாகவும் இருக்கக்கூடும்.

சென்னை கிளைமேட்

சென்னை மற்றும் புறநகர்ப் பகுதிகளைப் பொறுத்தவரை இன்றைய தினம் வானம் ஓரளவு மேகமூட்டத்துடன் காணப்படும். அதிகாலை வேளையில் ஓரிரு இடங்களில் மிதமான பனிமூட்டம் காணப்படும். அதிகபட்ச வெப்பநிலை 33-34° செல்சியஸை ஒட்டியும், குறைந்தபட்ச வெப்பநிலை 23-24° செல்சியஸை ஒட்டியும் இருக்கக்கூடும்" என்று அதில் தெரிவிக்கப்பட்டுள்ளது.