“மறக்க முடியாத கம்பீர குரல் மறைந்தது”.. தூர்தர்ஷன் செய்தி வாசிப்பாளர் சரளா மகேஸ்வரி காலமானார்!
சென்னை: தூர்தர்ஷனில் செய்தி வாசிப்பாளராகப் பணியாற்றி மிகவும் பிரபலமான சரளா மகேஸ்வரி இன்று காலமானார். செய்தி வாசிப்பாளர் மட்டுமின்றி எழுத்தாளர், கவிஞர் மற்றும் முன்னாள் மாநிலங்களவை உறுப்பினர் என பன்முகம் கொண்டவர் சரளா மகேஸ்வரி.
பாலிவுட் நடிகர் ஷாருக்கான் படித்த டெல்லி பல்கலைக்கழகத்தின் ஹன்ஸ்ராஜ் கல்லூரியில் விரிவுரையாளராகவும் பணியாற்றினார் சரளா மகேஸ்வரி. மேற்கு வங்கத்தில் இருந்து மார்க்சிஸ்ட் கம்யூனிஸ்ட் கட்சி சார்பில் ராஜ்யசபா உறுப்பினராக தேர்ந்தெடுக்கப்பட்டவர் சரளா மகேஸ்வரி. இவர் சுமார் 16 புத்தகங்களை எழுதியுள்ளார். 71 வயதான இவர் இன்று டெல்லியில் காலமானார்.
இந்தியத் தொலைக்காட்சி வரலாற்றில் ஒரு சகாப்தமாகத் திகழ்ந்த தூர்தர்ஷன் செய்தி வாசிப்பாளர் சரளா மகேஸ்வரி (71) இன்று காலமானார். அவரது மறைவிற்கு தூர்தர்ஷன் தொலைக்காட்சி நிறுவனம் சார்பில் இரங்கல் தெரிவிக்கப்பட்டுள்ளது.
80 - 90-களில் தொலைக்காட்சியில் செய்தி என்றாலே நினைவுக்கு வரும் ஒருசில முகங்களில் சரளா மகேஸ்வரியின் முகம் பரிச்சயமானது. எவ்விதப் பதற்றமும் இல்லாத அவரது வாசிப்பு முறையும், தெளிவான உச்சரிப்பும் அவரை நாடு முழுவதும் பட்டிதொட்டியெங்கும் பிரபலம் ஆக்கின.
1976-ல் தொடங்கிய இவரது செய்தி வாசிப்புப் பயணம் 2005 வரை சுமார் 30 ஆண்டுகள் தூர்தர்ஷனுடன் நீடித்தது. கறுப்பு வெள்ளை தொலைக்காட்சி காலத்தில் தொடங்கி, வண்ணத் தொலைக்காட்சி காலம் வரை செய்தி வாசிப்பில் ஒரு சகாப்தமாக விளங்கியவர் சரளா மகேஸ்வரி.
1991-ல் முன்னாள் பிரதமர் ராஜீவ் காந்தி படுகொலை செய்யப்பட்ட செய்தியை தேசத்திற்கே அறிவித்த கனத்த குரல் இவருடையதுதான். அன்னை தெரசாவின் இறுதிச் சடங்கு உள்ளிட்ட பல வரலாற்று நிகழ்வுகளைத் தனது கம்பீரமான குரலால் மக்களிடம் கொண்டு சேர்த்தவர்.
இவரது மறைவு செய்தித் துறையினரிடையே பெரும் சோகத்தை ஏற்படுத்தியுள்ளது. அவரது மறைவிற்கு தூர்தர்ஷன் தொலைக்காட்சி நிறுவனம் சார்பில் இரங்கல் தெரிவிக்கப்பட்டுள்ளது. டெல்லி நிகம் போத் காட்டில் இன்று மாலை சரளா மகேஸ்வரின் இறுதிச் சடங்குகள் நடைபெறுகின்றன.
Click it and Unblock the Notifications
Sign in with Google