இதுதான் கடைசி.. மிக முக்கியமான 27 கிமீ.. சென்னை பெரிபெரல் ரிங் ரோடு.. நிறைவு பெறப்போகும் பணிகள்?

சென்னை: சென்னை புறநகர் சுற்றுவட்டச் சாலையின் இறுதிக்கட்டப் பணிகளுக்கான ஒப்பந்தப்புள்ளி அறிவிக்கப்பட்டுள்ளது. சிங்கப்பெருமாள்கோவில் முதல் பூஞ்சேரி வரையிலான 27.41 கிலோமீட்டர் தூரத்திற்கு இந்தச் சாலை அமையவுள்ளது.

இந்தத் திட்டம் மொத்தம் நான்கு தொகுப்புகளாகப் பிரிக்கப்பட்டுள்ளது. ஆறு வழித்தடங்களைக் கொண்ட இந்தச் சாலை, அணுகு கட்டுப்பாடுடன் அமைக்கப்படும். கூடுதலாக, இரு சர்வீஸ் சாலைகளும் இத்திட்டத்தின் ஒரு பகுதியாக இருக்கும்.

சென்னை புறநகர் சுற்றுவட்டப்பாதை

சென்னை பெரிபெரல் ரிங் ரோடு திட்டத்தின் மூன்றாம் கட்டப் பணிகள் 80% நிறைவடைந்து, திட்டமிட்டதை விட வேகமாக நடைபெறுகின்றன. இச்சாலையின் ஒரு பகுதி ஜனவரி மாதத்தில் போக்குவரத்துக்குத் திறக்கப்படும் என அறிவிக்கப்பட்டுள்ளது. எண்ணூர் துறைமுகத்திலிருந்து கனரக வாகனப் போக்குவரத்தை எளிதாக்கி, போக்குவரத்து நெரிசலைக் குறைப்பதே இத்திட்டத்தின் முக்கிய நோக்கம்.

தமிழ்நாடு நெடுஞ்சாலைத் துறையின் கீழ், எண்ணூர் துறைமுகம் முதல் மாமல்லபுரம் வரை சுமார் 132.87 கி.மீ தூரத்திற்கு இந்தச் சாலை பல கட்டங்களாக அமைக்கப்படுகிறது. இத்திட்டம், தேசிய நெடுஞ்சாலை ஆணையத்தின் (NHAI) பெங்களூரு-சென்னை விரைவுச் சாலை மற்றும் சித்தூர்-தச்சூர் விரைவுச் சாலைத் திட்டங்களுடன் இணைக்கப்படும். இதற்கான விரிவான திட்ட அறிக்கை (DPR) ஏற்கனவே தயாராகியுள்ளது.

சென்னை பெரிபெரல் ரிங் ரோட்டின் மூன்றாம் கட்டப் பணிகளைத் சமீபத்தில் துணை முதல்வர் உதயநிதி ஸ்டாலின் திருவள்ளூரில் தொடங்கி வைத்தார். திருவள்ளூர் புறவழிச்சாலை முதல் வெங்கத்தூர் (10.4 கி.மீ), வெங்கத்தூர் முதல் செங்காடு (10 கி.மீ), மற்றும் செங்காடு முதல் திருப்பெரும்புதூர் (9.7 கி.மீ) வரையிலான சுமார் 30 கி.மீ தூரத்திற்கு ஆறுவழிப்பாதை மற்றும் இருவழி சேவைச் சாலை அமைக்கப்படவுள்ளது. இதன் மொத்த செலவு 2,689.74 கோடி ரூபாய் ஆகும். பணிகளை விரைந்து முடித்து மக்களின் பயன்பாட்டிற்கு கொண்டு வர அதிகாரிகளுக்கு அவர் அறிவுறுத்தினார்.

சென்னை அவுட்டர் ரிங் ரோடு - சாலைப் பணி

இந்தச் சாலைப் பணி நிறைவடையும்போது, தமிழ்நாட்டின் போக்குவரத்து வசதி மேம்படுவதுடன், தொழில்துறை வாய்ப்புகளும் அதிகரிக்கும் என எதிர்பார்க்கப்படுகிறது. ஜப்பான் சர்வதேச கூட்டுறவு நிறுவனம் (JICA) இத்திட்டத்திற்காக ₹2,784 கோடி வெளிநாட்டு நிதியை வழங்கியுள்ளது. சிங்கப்பெருமாள்கோயில் முதல் பூஞ்சேரி (மாமல்லபுரம் அருகே) வரையிலான சென்னை பெரிபெரல் ரிங் ரோட்டின் பிரிவு 5-க்கு நிலம் கையகப்படுத்துதல், மறுவாழ்வு மற்றும் மீள்குடியேற்றப் பணிகளை மேற்கொள்ள தமிழ்நாடு சாலை மேம்பாட்டு கழகம் (TNRDC) ஆலோசகர்களை நியமித்துள்ளது.

சென்னை பெரிபெரல் ரிங் ரோடு திட்டத்தின் மொத்த மதிப்பிடப்பட்ட செலவு ₹12,301 கோடி. இதன் நீளம் சுமார் 132.87 கி.மீ ஆகும். இச்சாலையில் ஆறு பிரதான பாதைகளும், இருபுறமும் இரண்டு சேவைப் பாதைகளும் என மொத்தம் 10 பாதைகள் அமையவுள்ளன. இச்சாலை 120 கி.மீ/மணி வடிவமைப்பு வேகத்துடன் கட்டப்படுகிறது. எண்ணூர்-தச்சூர் பிரிவு தற்போது கட்டுமானத்தில் உள்ளது, மேலும் இத்திட்டம் 2025ஆம் ஆண்டுக்குள் நிறைவடையும் என எதிர்பார்க்கப்படுகிறது.

சென்னை சாலை - மொத்த மதிப்பிடப்பட்ட செலவு

பிரிவுகள் 2 மற்றும் 3 (56.2 கி.மீ, தச்சூர் முதல் செங்காடு வரை) ஆசிய உள்கட்டமைப்பு முதலீட்டு வங்கி (AIIB) மற்றும் சர்வதேச வளர்ச்சிக்கான OPEC நிதி (OFID) ஆகியவற்றின் மூலம் முறையே USD 378 மில்லியன் மற்றும் USD 100 மில்லியன் கடன் உதவியுடன் அமைக்கப்படவுள்ளது. இத்திட்டம் தமிழ்நாடு சாலை மேம்பாட்டு கழகத்தின் (TNRDC) கீழ் பொறியியல், கொள்முதல் மற்றும் கட்டுமானம் (EPC) மாதிரியில் செயல்படுத்தப்படுகிறது.

எண்ணூர் துறைமுகம் முதல் மாமல்லபுரம் வரையிலான 133 கி.மீ நீளமுள்ள சென்னை பெரிபெரல் ரிங் ரோட்டின் பெரும்பகுதி 2025ஆம் ஆண்டு இறுதிக்குள் நிறைவடையும். இத்திட்டத்திற்கான நிலம் கையகப்படுத்தும் பணிகள் இறுதிக்கட்டத்தை எட்டியுள்ளன. தமிழ்நாடு மாநில நெடுஞ்சாலைத் துறையால் 132.87 கி.மீ தூரத்திற்கு இந்தச் சாலை அமைக்கப்படவுள்ளது.

இந்த 10 வழி அணுகல் கட்டுப்பாடு விரைவுச்சாலை, எண்ணூர் துறைமுகம் மற்றும் மகாபலிபுரத்தை இணைக்கும். இது சென்னையின் நான்காவது ரிங் ரோடாக அமையும். சிங்கப்பெருமாள்கோயில், ஸ்ரீபெரும்புதூர், திருவள்ளூர், தாமரைப்பாக்கம், பெரியபாளையம், புதுவொயல், காட்டுப்பள்ளி ஆகிய நகரங்களை இணைக்கும் வகையில் ₹12,301 கோடி மதிப்பீட்டில் இது உருவாகிறது.

இந்த 10 வழிச்சாலை இந்தியாவில் மிகப்பெரிய சாலைகளில் ஒன்றாக இருக்கும். உலகிலேயே 132 கி.மீ நீளத்திற்கு ரிங் ரோடு அமைக்கப்படுவது இதுவே முதல்முறை. மாமல்லபுரத்தில் இருந்து காட்டுப்பள்ளி துறைமுகத்தை இணைக்கும் இந்த சென்னை வெளிவட்டச் சாலையின் பணிகள் இரண்டு கட்டங்களாக நிறைவடைந்து ஜனவரியில் போக்குவரத்துக்கு திறக்கப்படும். எண்ணூர் காமராஜர் துறைமுகம், காட்டுப்பள்ளி அதானி, எல் அண்ட் டி போன்ற தனியார் துறைமுக நிறுவனங்கள் இத்திட்டத்தை விரைந்து முடிக்க தமிழக அரசை வலியுறுத்தி உள்ளன. இச்சாலை முடிந்தவுடன் சென்னையில் போக்குவரத்து நெரிசல் மற்றும் காற்று மாசுபாடு கணிசமாகக் குறையும் என எதிர்பார்க்கப்படுகிறது.

English summary

Chennai Peripheral Ring Road: Tenders floated for last & the final phase Singaperumalkoil to Poonjeri