பெங்களூரில் தமிழ் படம் திரையிட்ட தியேட்டர் மீது தாக்குதல்

பெங்களூர்:

பெங்களூரில் விஜய்காந்தின் எங்கள் அண்ணா படம் திரையிடப்பட்ட தியேட்டர் மீது கடும் தாக்குதல் நடந்தது. தியேட்டர் மீது கல்வீசிய கும்பல், பேனர்களுக்கும் தீ வைத்தது.

சிவாஜி நகரில் உள்ள சங்கீத்-சந்தீப் தியேட்டரில் இந்தப் படம் கடந்த வாரம் வெளியிடப்பட்டது. இதையடுத்து விஜய்காந்தின் ரசிகர்கள் தமிழில் பேனர்கள் கட்டினர். தமிழிலேயே சுவரொட்டிகளும் ஒட்டப்பட்டிருந்தன.

இந் நிலையில் கன்னட வெறிக் கும்பல் திடீரென தியேட்டர் மீது தாக்குதல் நடத்தி தமிழ் பேனர்களை இழுத்துப் போட்டு தீ வைத்தது. கற்களையும் வீசியது. இது தொடர்பாக கமர்ஷியல் ஸ்ட்ரீட் போலீசாரிடம் புகார் கொடுக்கப்பட்டது. அவர்கள் உரிய நடவடிக்கை எடுக்காததால் கமிஷ்னர் அலுவலகத்திலும் புகார் தரப்பட்டுள்ளது.

பெங்களூர் மக்கள் தொகையில் தமிழர்கள் சுமார் 40 சதவீதம் இருப்பது குறிப்பிடத்தக்கது.