மதமாற்ற தடை சட்டத்தை மீண்டும் அமல்படுத்த கோரி போராட்டம்; பாஜக பரிசீலனை

சென்னை:

கட்டாய மதமாற்ற தடுப்புச் சட்டத்தை மீண்டும் அமல்படுத்தக் கோரி போராட்டம் நடத்துவது குறித்து தமிழக பாஜக பரிசீலித்து வருவதாக அக்கட்சியின் பொதுச் செயலாளர் குமாரவேலு கூறியுள்ளார்.

சென்னையில் செய்தியாளர்களிடம் அவர் பேசுகையில், கட்டாய மதமாற்றத் தடுப்புச் சட்டத்தை தமிழக அரசு வாபஸ் பெற்றுள்ளது தவறான நடவடிக்கை ஆகும். இந்த சட்டத்தை மீண்டும் அமல்படுத்த வேண்டும்.

கட்டாய மதமாற்றத் தடுப்புச் சட்டத்தை மீண்டும் அமல்படுத்தக் கோரி போராட்டம் நடத்துவது குறித்து தமிழக பாஜக பரிசீலித்து வருகிறது. இதுகுறித்து விரைவில் முடிவெடுக்கப்படும்.

தமிழக அரசு பல்வேறு சலுகைகளை அறிவித்து வருகிறது. இதை தமிழக பாஜக வரவேற்கிறது.

தமிழகத்தில் அதிமுகவுடன் கூட்டணி குறித்து கட்சி மேலிடம்தான் முடிவு செய்யும். தற்போதைக்கு தோழமை தொடர்கிறது. மேலும் இது குறித்து பத்திரிக்கைகள் வாயிலாக விவாதிக்க முடியாது.

சட்டசபையில் அரசின் நல்ல திட்டங்களுக்கு ஆதரவு தருவோம். பாஜக கொள்கைக்கு எதிராக இருந்தால் எதிர்ப்போம்.

இன்று பிறந்தநாள் காணும் திமுக தலைவர் கருணாநிதிக்கு பத்திரிக்கைகள் மூலம் எங்களது வாழ்த்துக்களைத் தெரிவித்துக் கொள்கிறோம் என்றார் குமாரவேலு.