யூரோ 2004: ரஷ்யாவை வென்றது போர்ச்சுகல்

லிஸ்பன்:

போர்ச்சுகல் தலைநகர் லிஸ்பனில் நடந்து வரும் யூரோ-2004 கால்பந்து ஆட்டப் போட்டியில் இன்று ரஷ்யா அணியை 2-0 என்ற கோல் கணக்கில் போர்ச்சுகல் அணி வென்றது.

ஏ பிரிவில் இடம் பெற்றுள்ள போர்ச்சுகல், ரஷ்யா அணிகள் இன்று மோதின. முதல் போட்டியில் கிரீஸ் நாட்டு அணியிடம் தோல்வியடைந்ததால், இன்றைய போட்டியில் வெற்றி பெற்றாக வேண்டிய கட்டாயத்தில் போர்ச்சுகல் களமிறங்கியது.

அந்த அணியின் மன்ச்சி மற்றும் ரூய் கோஸ்டா அடித்த அபாரமான கோல்கள் மூலம் ஆட்டம் முழுவதும் போர்ச்சுகல் ஆதிக்கம் செலுத்தியது. மாறாக ஒரு கோல் கூட அடிக்க முடியாமல் ரஷ்ய அணி தடுமாறியது.

இந்தப் போட்டியில் வென்றதன் மூலம் போர்ச்சுகல் அணி அடுத்த சுற்றுக்கு முன்னேறும் வாய்ப்பு அதிகரித்துள்ளது. வரும் ஞாயிற்றுக் கிழமை நடைபெறும் போட்டியில் ஸ்பெயின் அணியை வீழ்த்தினால், போர்ச்சுகல் காலிறுதிக்குத் தகுதி பெறும்.

அணியின் வெற்றி குறித்து கேப்டன் லூயிஸ் ஃபிகோ கூறுகையில், இன்றைய ஆட்டத்தில் வெற்றி பெறாவிட்டால் போட்டியை வெளியேற வேண்டிய நிலையில்தான் ஆடுகளத்தில் இறங்கினோம். இந்த சவாலை எல்லா வீரர்களும் புரிந்து கொண்டு விளையாடியதால்தான் வெற்றி பெற்றோம்.

ஸ்பெயின் அணியுடன் விளையாட வேண்டிய போட்டியும் முக்கியமான ஒன்றாகும். அந்த அணியில் நல்ல வீரர்கள் பலர் இருக்கிறார்கள். இருப்பினும் தாய் மண்ணில் விளையாடுவது எங்களுக்குச் சாதகமாகும் என்று கூறினார்.