கலாமுக்கு வந்த துப்பாக்கி, குண்டு பார்சல்

டெல்லி:

ஜனாதிபதி அப்துல் கலாமுக்கு பிஸ்டல், குண்டுகள் கொண்ட பார்சல் அனுப்பப்பட்டுள்ளது.

நாட்டுத் துப்பாக்கியும் குண்டுகளும் கொண்ட அந்த பார்சல் இன்று காலை ராஷ்ட்ரபதி பவனுக்கு வந்தது.

கலாமின் பெயருக்கு அனுப்பப்பட்ட இந்த பார்சல் பிகாரில் இருந்து வந்துள்ளது.

அனுப்பியவரின் முகவரியாக, மகேஷ் சாவ், முஜாகித்பூர், பீர்சாவா போஸ்ட் பாக்ஸ், பாட்னா என்ற முகவரி குறிப்பிடப்பட்டுள்ளது.

ராஷ்ட்ரபதி பவனில் எக்ஸ்ரே சோதனைக்குப் பிறகே எந்த பார்சலும் உள்ளே அனுமதிகப்படும். இன்று வழக்கம்போல் பார்சல்களை சோதனையிட்டபோது இந்த பிஸ்டல், குண்டுகள் கண்டுபிடிக்கப்பட்டன.

உடனடியாக இது குறித்து டெல்லி போலீசாரிடம் தகவல் தெரிவிக்கப்பட்டு, விசாரணையும் தொடங்கியுள்ளது. உளவுப் பிரிவினரும் தங்களது விசாரணையை ஆரம்பித்துள்ளனர்.