பெரியாரை ஓரம்கட்டிய கிரிக்கெட்!

சென்னை:

தந்தை பெரியாரின் 126வது பிறந்த நாளையொட்டி சென்னை தொலைக்காட்சி நிலையம் தயாரித்திருந்த குறும்படம், கிரிக்கெட் போட்டிகாரணமாக ரத்து செய்யப்பட்டது.

திராவிடர் கழகத்தைத் தோற்றுவித்த தந்தை பெரியாரின் 126-வது பிறந்த நாள் நேற்று தமிழகம் முழுவதும் கொண்டாடப்பட்டது.பெரியாரின் நினைவாக அவரது வாழ்க்கை வரலாற்றை அய்யா என்ற பெயரில் பத்திரிக்கையாளர் ஞானி குறும்படமாக தயாரித்துள்ளார்.

அந்தக் குறும் படத்தை 5 பகுதிகளாக சென்னைத் தொலைக்காட்சி நிலையம் ஒளிபரப்ப ஏற்பாடு செய்யப்பட்டிருந்தது. முதல் இரண்டுபகுதிகள் செப்டம்பர் 3 மற்றும் 10 ஆகிய தேதிகளில் ஒளிபரப்பானது. 3வது பகுதி நேற்று ஒளிபரப்பப்படும் என அறிவிக்கப்பட்டிருந்தது.

வெள்ளிக்கிழமை இரவு 8.30 மணிக்கு அய்யா நிகழ்ச்சி ஒளிபரப்பப்படும் என அறிவிக்கப்பட்டிருந்த நிலையில், இங்கிலாந்தில்இலங்கைக்கும், இங்கிலாந்து அணிக்கும் இடையே நடந்த கிரிக்கெட் போட்டி ஒளிபரப்பானது.

இதற்கு திராவிடர் கழகம் கடும் கண்டனம் தெரிவித்துள்ளது. இது குறித்து தி.க. பொதுச் செயலாளர் கி.வீரமணி கூறுகையில்,

தூர்தர்ஷனின் இந்தப் போக்கு மிகவும் கண்டிக்கத்தக்கது. கிரிக்கெட் போட்டியை ஒளிபரப்பும் முன்பு, பெரியார் குறித்த நிகழ்ச்சி நேரமாற்றத்தையாவது நேயர்களுக்கு அறிவித்திருக்கலாம். இதுகுறித்து மத்திய செய்தி, ஒளிபரப்பு அமைச்சகத்தின் கவனத்திற்குக் கொண்டுசெல்வோம் என்றார்.