கூட்டணி: ஜெ.வுடன் புதுவை கண்ணன் சந்திப்பு

சென்னை:

முதல்வர் ஜெயலலிதாவை, புதுச்சேரி முன்னேற்ற காங்கிரஸ் கட்சியின் தலைவர் ப.கண்ணன் சந்தித்து கூட்டணி குறித்துப் பேசினார்.

பல கட்சிகள், பல கூட்டணிகள் கண்டவர் கண்ணன். தேர்தலுக்கு ஒரு கட்சி, தேர்தலுக்கு ஒரு கூட்டணி என்ற கொள்கையுடன் சர்க்கஸ் நடத்தி வந்தாலும் பாண்டிச்சேரி அரசியலில் தவிர்க்க முடியாத சக்தி இவர்.

இந் நிலையில் தமிழகத்துடன் நடக்கும் புதுவை சட்டசபைத் தேர்தலில் அதிமுகவுடன் இணைந்து போட்டியிட கண்ணன் முடிவு செய்துள்ளார். இதுதொடர்பாகவும், தொகுதிப் பங்கீடு தொடர்பாகவும் போயல் கார்டன் இல்லத்தில் ஜெயலலிதாவைச் சந்தித்துப் பேசினார்.

இந்த சந்திப்பின்போது புதுவை மாநில முன்னாள் அமைச்சர் லட்சுமி நாராயணன், மாநில அதிமுக செயலாளர் அன்பழகன், அதிமுக தேர்தல் பிரிவுச் செயலாளரும் அமைச்சருமான ஓ.பன்னீர் செல்வம், அமைச்சர் ஜெயக்குமார் உள்ளிட்டோர் உடன் இருந்தனர்.

கூட்டணி அமைப்பது தொடர்பான இந்த சந்திப்பு மிகவும் சுமூகமான முறையில் நடைபெற்றதாக அதிமுக செய்திக் குறிப்பில் தெரிவிக்கப்பட்டுள்ளது.