சத்யராஜின் சாமியார் படம்-தடை கோரும் இந்து கட்சி

கோவை:சத்யராஜ் நடிக்க சாமியார் என்ற பெயரில் எடுக்கப்படும் தமிழ்த் திரைப்படத்துக்கு தடை விதிக்க வேண்டும் என ஹிந்து மக்கள் கட்சி கேட்டுக் கொண்டுள்ளது.

தமிழகத்தின் பல சாமியார்களை கிண்டலடிக்கும் வகையில் இந்தப் படம் உருவாக்கப்பட்டு வருகிறது.

இந் நிலையில் கோவையில் நிருபர்களிடம் பேசிய இந்து மக்கள் கட்சியின் மாநில செயலாளர் செந்தில் குமார்,

சாமியார் என்ற பெயரில் எடுக்கப்படும் தமிழ்த் திரைப் படத்தில் இந்துக்களை பற்றி அவதூறான தகவல்களை தெரிவிப்பதாக உள்ளது. அது மட்டுமல்லாது இந்துக்கள் அதிகம் வாழும் இந்திய நாட்டில், இது போன்ற திரைப்படங்கள் எடுக்க அனுமதிக்கக் கூடாது என தமிழக அரசுக்கு கடிதம் எழுதியுள்ளேன்.

ஒரு சிலர் செய்த தவறுக்காக மொத்த இந்து சமுதாயத்தையும் அநாகரீகமாக காட்டும் இப்படிப்பட்ட படங்களை எடுக்க அனுமதிக்கக் கூடாது என திரைப்படத் துறையினரையும் கேட்டுக் கொள்கிறேன் என்றார்.