அமைச்சர் ஆவாரா கனிமொழி?

சென்னை: திமுக எம்.பியும், முதல்வர் கருணாநிதியின் மகளுமான கனிமொழி மத்திய அமைச்சராகக் கூடும் என்பதை முதல்வர் கருணாநிதி சூசகமாக உணர்த்தியுள்ளார்.

திமுகவுக்கும், சன் டிவிக்கும் இடையிலான உறவு முறிந்ததும், தனது மத்திய அமைச்சர் பதவியை தயாநிதி மாறன் ராஜினாமா செய்தார். இதைத் தொடர்ந்து கனிமொழி ராஜ்யசபா எம்.பி. ஆக்கப்பட்டார். அவர் அமைச்சராக்கப்படலாம் என்றும் தயாநிதி மாறன் வகித்த தொலைத் தொடர்புத் துறை அவருக்கு ஒதுக்கப்படலாம் என்றும் பேச்சு கிளம்பியது.

இருப்பினும் உடனடியாக கனிமொழி அமைச்சராக்கப்படவில்லை. இருப்பினும் டெல்லியில் நல்ல அனுபவம் கிடைத்த பின்னர் கனிமொழி அமைச்சராக்கப்படக் கூடும் என்று எதிர்பார்க்கப்பட்டது.

இந்த நிலையில் கனிமொழிக்கு மத்திய அமைச்சர் பதவி தரப்படுமா, அவர் அமைச்சராக்கப்படுவாரா என்ற கேள்விக்கு முதல்வர் கருணாநிதி முன்பு போல எதிர்மறையாக இல்லாமல், சூசகமாக சாதகமாக பதிலளித்துள்ளார்.

இதுகுறித்த கேள்விக்கு அவர் பதிலளிக்கையில், எப்போதாவது ஆகலாம் என்று புன்னகையுடன் கூறியுள்ளார். இதன் மூலம் விரைவில் கனிமொழி அமைச்சர் ஆகக் கூடும் என்பதை முதல்வர் கருணாநிதி சூசகமாக தெரிவித்துள்ளதாக கருதப்படுகிறது.

காங்கிரஸ் தலைவர் சோனியா காந்தி தனது சீனப் பயணத்தை முடித்து விட்டு நாடு திரும்பியதும், பிரதமர் மன்மோகன் சிங் அமைச்சரவையில் மாற்றம் செய்வார் என்ற எதிர்பார்ப்பு நிலவி வரும் சூழ்நிலையில் முதல்வர் கருணாநிதியின் இந்த பதில், கனிமொழிக்கு விரைவில் அமைச்சர் பதவி கிடைக்கும் என்ற எதிர்பார்ப்பை அதிகப்படுத்தியுள்ளது.