விளம்பரத்திற்காக தான் கிரிக்கெட் பார்க்கிறார்களா?-கபில்

ஜெய்பூர்: கிரிக்கெட் பார்க்கும் அனைவரும் அவர்களை விளம்பரப்படுத்தி கொள்வதற்காக தான் பார்க்கிறார்களா என்று ஷாருக் கான் பற்றி விமர்சித்த பிசிசிஐக்கு முன்னாள் கேப்டன் கபில்தேவ் கடும் கண்டனம் தெரிவித்துள்ளார்.

நடிகர் ஷாருக் கான் அவர் நடித்த படத்திற்காகவும், அவரை விளம்பரப்படுத்தி கொள்வதற்காகவும் தான் கிரிக்கெட் போட்டிகளை பார்க்க கிரவுண்டுக்கு வருவதாக இந்திய கிரிக்கெட் வாரிய செயலாளர் ரத்னாகர் ஷெட்டி கூறியிருந்தார்.

இது குறித்து கபில்தேவ் கூறியதாவது,

ஷாருக் கான் கிரிக்கெட் பார்த்தது அவருடைய சுய விளம்பரத்திற்காக என்று கூறவது தவறு. இப்போது கிரிக்கெட் போட்டிகளை நாட்டின் ஜனாதிபதி, பிரதமர், முக்கியமான அமைச்சர்கள் மற்றும் மிகப் பெரிய தொழிலதிபர்கள் அனைவரும் நேரில் வந்து பார்க்கிறார்கள்.

அதற்காக அவர்கள் எல்லாம் தங்களை விளம்பரப்படுத்திக் கொள்வதற்காகவா பார்க்கிறார்கள். கிரிக்கெட் போட்டியில் விளையாடும் வீரர்களை ஊக்கப்படுத்துவதற்காக நேரடியாக கண்டுகளிக்க வருகிறார்கள்.

நடிகர் ஷாருக் கானை பற்றி சொல்வதற்கு ரத்னாகர் ஷெட்டிக்கு உரிமை கிடையாது. ஷாருக் கான் கிரிக்கெட் வெறியர். எல்லா விளையாட்டுகளையும் விரும்புபவர். அவரைக் குறை சொல்வது கிரிக்கெட் போட்டியை கண்டுகளிக்கும் எல்லோரையும் குறை சொல்வது மாதிரி தான்.

ஷெட்டியின் பேச்சு கண்டிக்கத்தக்கது என்றார் கபில்தேவ்.