சென்னையில் திமுக மகளிர் அணி பிரமுகர் கொலை

சென்னை: சென்னை கே.கே.நகர் பகுதி திமுக மகளிர் அணிச் செயலாளர் கொலை செய்யப்பட்டு சாக்கு மூட்டையில் கை-கால்கள் கட்டப்பட்ட நிலையில் கிடந்தார்.

சென்னை படப்பை பகுதியை அடுத்த மணிமங்கலம் ஏரியின் மதகு அருகே ஒரு சாக்கு மூட்டை கிடந்தது. அதிலிருந்து துர்நாற்றம் வீசியதையடுத்து போலீசார் அதை பிரித்துப் பார்த்தனர்.

அதில் ஒரு பெண் கொலை செய்யப்பட்டு கை, கால்கள் கட்டப்பட்ட நிலையில் கிடந்தார்.

இது குறித்து நடத்தப்பட்ட விசாரணையில், கொலையான அந்தப் பெண் சென்னை கே.கே.நகர் பகுதி தி.மு.க. மகளிர் அணிச் செயலாளரான பால்மலர் (30) என்று தெரியவந்தது.

அவரது உடலை கணவர் பெயர் குமரவேல் அடையாளம் காட்டினார்.
கடந்த 1ம் தேதி கணவன்-மனைவி இருவரும் சொந்த ஊரான மதுரைக்கு சென்றுள்ளனர். 2ம் தேதி பால்மலர் மட்டும் ரயில் மூலம் சென்னை திரும்பினார்.

3ம் தேதி காலை சென்னை கே.கே.நகரில் உள்ள வீட்டுக்கு வந்து சேர்ந்ததும், கணவருக்கு தகவல் தெரிவித்தார்.

இந் நிலையில் 4ம் தேதி மதுரையிவிருந்து சென்னை திரும்பினார் குமாரவேல். அப்போது வீடு பூட்டிக் கிடந்துள்ளது. இந் நிலையில் தான் சாக்கு மூட்டையில் பால்மலரின் உடல் கண்டெடுக்கப்பட்டுள்ளது.

இந்தத் தம்பதிக்கு யோகேஷ் (10), நிவேதா (9) ஆகிய குழந்தைகள் ள்ளனர். கே.கே.நகர் பகுதியில் மகளிர் சுய உதவிக் குழுவிலும் பால்மலர் தீவிரமாக செயல்பட்டு வந்துள்ளார்.

கே.கே.நகர் பகுதியில் போலீசார் நடத்திய விசாரணையில் பால்மலர் குறித்து பல கசமுசா தகவல்கள் வெளியில் வந்துள்ளன.

இளம் பெண்களை வைத்து அவர் தவறான காரியங்களில் ஈடுபட்டு வந்ததாகவும் தெரியவந்துள்ளது. அவர் காணாமல் போன அன்று, 3ம் தேதி பகல் 12.30 மணிக்கு 2 இளம் பெண்களுடன் ஆட்டோவில் சென்றார் எனத் தெரிய வந்துள்ளது.

பணம் வாங்கிக் கொண்டு அரசு வேலைகள், காண்ட்ராக்ட்களுக்கு சிபாரிசு செய்வது, வேலை வாங்கி தருவது உள்ளிட்ட செயல்களிலும் ஈடுபட்டு வந்துள்ளார் பால்மலர். இதன்மூலம் நன்றாக பணமும் ஈட்டியுள்ளார். இந்தப் பணத்தை வட்டிக்கும் விட்டு வந்துள்ளார்.