இந்திய கடல் எல்லைக்குள் நுழைந்த 17 இலங்கை மீனவர்கள் கைது

சென்னை: இந்திய கடல் பகுதியில் அத்துமீறி நுழைந்து மீன் பிடித்துக் கொண்டிருந்த 17 சிங்கள மீனவர்கள் கைது செய்யப்பட்டனர். அவர்களது 3 படகுகளும் கைப்பற்றப்பட்டது.

இந்திய கடலோர காவல் காவல்படைக்கு சொந்தமான சாகர் கப்பல், நேற்று இந்திய கடல் பகுதியில் ரோந்து பணியில் ஈடுபட்டது. அதற்கு உதவியாக, இந்திய கடற்படையின் விமானமும் கண்காணிப்பில் ஈடுபட்டிருந்தது.

அப்போது இந்திய கடற்பகுதிக்குள் அத்துமீறி 3 மர்ம படகுகள் நுழைந்ததை அவை பார்த்து விட்டன. இதையடுத்து உடனடியாக அந்த படகுகளை இந்திய கடலோர காவல் படையினர் முற்றுகையிட்டனர்.

பின்னர் 3 படகுகளையும் பிடித்தனர். 3 படகுகளிலும் 17 மீனவர்கள் இருந்தனர். அவர்கள் சிங்கள மீனவர்கள் என்பது தெரியவந்தது. அனைவரும் கைது செய்யப்பட்டனர். அவர்கள் வைத்திருந்த மீன்களும் கைப்பற்றப்பட்டது.

அவர்கள் வந்த வத்சோம்', புஷ்ரஜ்னி', சிங்களா' என்ற பெயருடைய 3 படகுகளும் பறிமுதல் செய்யப்பட்டது.

பறிமுதல் செய்யப்பட்ட படகுகளையும், கைதான சிங்கள மீனவர்களையும் இந்திய கடலோர காவல் படை கப்பலில் ஏற்றி, சென்னைக்கு அழைத்து வருகிறார்கள்.

இன்று அவர்கள் காசிமேடு மீன் பிடி துறைமுகத்துக்கு கொண்டு வரப்படுகிறார்கள். பின்னர் அவர்கள் போலீசாரிடம் ஒப்படைக்கப்படுவார்கள்.