துணை முதல்வர் பதவி-சட்ட மசோதா தாக்கல்
சென்னை: துணை முதல்வர் பதவியை சட்டப்படி பதிவு செய்வதற்கான மசோதா இன்று சட்டசபையில் தாக்கல் செய்யப்பட்டது.
இன்று சட்டமன்றத்தில் 9 சட்ட மசோதாக்கள் தாக்கல் செய்யப்பட்டன. அதில் அமைச்சர் மு.க.ஸ்டாலினை துணை முதல்வராக பதவி நியமனம் செய்ததை சட்டப்படி பதிவு செய்வதற்கான சட்டத் திருத்த மசோதாவும் அடக்கம்.
மேலும் புதிய வாகனங்களை பதிவு செய்யும் நேரத்திலேயே அவற்றின் மீது சாலை பாதுகாப்பு வரியை விதிக்க வகை செய்யும் சட்ட திருத்த மசோதா,
35 பேரை ஏற்றிச் செல்ல அனுமதிக்கப்பட்ட காண்ட்ராக்ட் பஸ்களின் தரை பரப்பின் அடிப்படையிலும், மற்ற காண்ட்ராக்ட் பஸ்களில் இருக்கைகளின் அடிப்படையிலும் அரசு வரி விதிக்க வகை செய்யும் சட்ட திருத்த மசோதா,
வரி விதிப்பின்போது அதை எதிர்த்து அப்பீல் செய்யும் வாகன உரிமையாளர்கள் அரசு விதித்த வரியில் 50 சதவீத வரியை செலுத்த வகை செய்யும் சட்ட திருத்த மசோதா,
செங்கல் சூளைகளின் அடுப்புகளின் அடிப்படையில் வரி விதிக்க வகை செய்யும் சட்ட திருத்த மசோதா,
விவசாய தொழிலாளர்கள் நல வாரியத்தின் இணை தலைவரை நியமிக்க வகை செய்யும் சட்ட மசோதா உள்பட 9 மசோதாக்கள் தாக்கல் செய்யப்பட்டன.
இவற்றை அமைச்சர்கள் ஸ்டாலின், கே.என்.நேரு, உபயதுல்லா, பெரியசாமி ஆகியோர் தாக்கல் செய்தனர்.