எல்லோரும் நிறைய பலூன் வாங்குங்க - பட்ஜெட்டை கிண்டலடித்து பாஜக போராட்டம்

சென்னை: பட்ஜெட்டில் பலூன் விலையைக் குறைத்து விட்டார்கள். எனவே பொதுமக்கள் நிறைய பலூன்களை வாங்கி விளையாடுங்கள் என்று கூறி பாஜக சார்பில் நூதனப் போராட்டம் நடத்தப்பட்டது.

பட்ஜெட்டில் முக்கியப் பொருட்களின் விலை உயர மத்திய அரசு வழி வகுத்துள்ளது. அதேசமயம், பலூன்கள், பொம்மைகளுக்கான உற்பத்தி வரியை அடியோடு ரத்து செய்துள்ளனர்.

இதை சுட்டிக் காட்டி நூதன முறையில் பாஜகவினர் சென்னையில் போராட்டம் நடத்தினர்.

மடிப்பாக்கம் பொன்னியம்மன் கோவில் சந்திப்பில் நூற்றுக்கும் மேற்பட்ட பாஜகவினர், ஊதிய பலூன்களை ரோட்டோரத்தில் நின்றவர்களிடம் வழங்கினார்கள். சிலர் எதற்கு பலூன் கொடுக்கிறார்கள் எனறு தெரியாமல் தவித்தனர். அங்கு நின்ற குழந்தைகள் மட்டும் ஓடிச்சென்று விளையாடுவதற்காக போட்டி போட்டு பலூன்களை வாங்கி சென்றார்கள்.

அத்தியாவசிய பொருட்கள் எல்லாம் விலை கூடிபோச்சு. பலூன் விலையை மட்டும் குறைத்து இருக்கிறார்கள். இனி எல்லோரும் பலூனை தாராளமாக வாங்குங்கள் என்று கிண்டலாக பிரசாரம் செய்தனர் பாஜகவினர்.

பாஜகவினர் பலூன் கொடுத்து நடத்திய இந்தப் போராட்டம் மக்களை வெகுவாக கவர்ந்தது.