முட்டை, கடுகு, கசகசாவுக்குள் டீன்-ஏஜ் ஜெயலலிதா - அசத்திய ஓவியர்

சென்னை: ஜெயலலிதாவின் படத்தை முட்டையின் உள் புறத்திலும், அரிசியிலும் வரைந்த ஓவியரின் திறமையை அதிமுக பொதுச் செயலாளர் ஜெயலலிதா பாராட்டி மகிழ்ச்சி தெரிவித்தார்.

சென்னை திருவொற்றியூரைச் சேர்ந்த ஓவியர் ஆர்ட் ராஜ் அதிமுக பொதுச் செயலாளர் ஜெயலலிதாவின் பள்ளிப்பருவ தோற்றம் உட்பட பல்வேறு படங்களை ஓவியமாக வரைந்தார்.

பள்ளி சீருடையுடன் உள்ள படத்தை முட்டை ஓட்டின் உள்பகுதியிலும், ஒற்றை அரிசி, கடுகு, கசகசா உள்ளிட்ட பொருட்களிலும் தத்ரூபமாக வரைந்துள்ளார்.

ஜெயலலிதாவை நேரில் சந்தித்து ஓவியர் தனது படைப்புகளை காட்டினார். ஜெயலலிதாவை அவரது இல்லத்திற்குப் போய் சந்தித்து இந்தப் பொருட்களை ஜெயலலிதாவின் பார்வைக்கு வைத்தார்.

அவற்றை ஒவ்வொன்றாகப் பார்த்து ரசித்த ஜெயலலிதா ஓவியரின் திறமையைப் மனதார பாராட்டினார்.

தேர்தல், விஐபி சந்திப்புகள்...:

இதற்கிடையே, பென்னாகரம் இடைத்தேர்தல் நடைபெற உள்ள நிலையில் ஜெயலலிதாவை, வன்னியர் கூட்டமைப்பின் தலைவர் சி.என்.ராமமூர்த்தி தலைமையிலான குழுவினர் நேரில் சந்தித்து ஆதரவு தெரிவித்தது.

அதேபோல ஜெயலலிதாவை, பிரபல பின்னணிப் பாடகி பி.சுசீலா, பழம்பெரும் திரைப்பட நடிகை குமாரி சச்சு ஆகியோரும் நேற்று சந்தித்தனர்.

அதிமுக தலைமைக் கழக செய்திக்குறிப்பில் இத்தகவல் தெரிவிக்கப்பட்டுள்ளது.