ஐரோப்பா, மேற்கு ஆப்ரிக்காவை குறிவைக்கும் ரஸ்னா!

'ரஸ்னா... எப்பவுமே' என்று விளம்பரத்தில் கண்ணடிக்கும் பாப்பா ரேஞ்சுக்கு சின்ன நிறுவனம் என்று பலரும் எண்ணிக் கொண்டிருக்கும் ரஸ்னா, இன்று கிட்டத்தட்ட ரூ 325 கோடி வர்த்தகம் கொண்ட பெரிய நிறுவனமாக வளர்ந்து நிற்கிறது.

இந்த ஆண்டு ஐரோப்பா மற்றும் மேற்கு ஆசியாவிலும் கால் பதிக்கிறது ரஸ்னா.

பெரிய, சிறிய நகரங்கள், கிராமங்கள் என்ற பேதமின்றி எங்கும் ஏழைகளின் குளிர்பானமாக வியாபித்துள்ளது ரஸ்னா. நுகர்வோர் சந்தையில் இந்த நிறுவனத்தின் தயாரிப்புக்கு நல்ல மவுசு உள்ளது. ஏற்கெனவே 35 நாடுகளுக்கு இதன் தயாரிப்புகள் ஏற்றுமதியாகின்றன. அமெரிக்கா, தென் ஆப்ரிக்கா, மத்திய கிழக்கு நாடுகள் போன்றவை இதில் அடக்கம்.

இந்த ஆண்டு தனது வர்த்தக அளவை ரூ 400 கோடிக்கு மேல் உயர்த்த முடிவு செய்துள்ள ரஸ்னா, ஐரோப்பா மற்றும் மேற்கு ஆப்ரிக்க நாடுகளிலும் தனது விற்பனையை விஸ்தரிக்கிறது. இந்த நாடுகளில் மட்டும் 20 சதவீதத்துக்கும் அதிகமாக விற்பனை செய்ய முடியும் என இந்நிறுவனம் நம்பிக்கை தெரிவித்துள்ளது.

ரஸ்னா துணைத் தலைவர் கிரீஷ் ஜாக்கி கூறுகையில், "தயார் நிலையில் உள்ள குளிர்பானம் தவிர, ஊறுகாய், சட்னி வகைகள், ஜாம், தயார் நிலையில் உள்ள உணவுப் பொருள்கள் போன்றவற்றையும் ரஸ்னா தயாரிக்கிறது. ஆனால் இவற்றை இந்திய மார்க்கெட்டில் விற்கும் திட்டம் இப்போதைக்கில்லை. முழுக்க முழுக்க ஏற்றுமதி நோக்கில்தான் இவை தயாரிக்கப்படுகின்றன.

இன்னொன்று, நம் நாட்டில் முன் தயாரிக்கப்பட்ட உணவுகளை விற்பது சாதாரண விஷயமில்லை. இடத்துக்கு இடம் மக்களின் ரசனை, சுவை மாறுகின்றன. எனவே அதற்கேற்ப தயாரித்து விற்பதில் பல சிக்கல்கள் உள்ளன. ஆனால் வெளிநாடுகளில் ஒரே மாதிரி சுவை கொண்டவர்களாக இருப்பது எங்களைப் போன்றவர்களுக்கு வசதியாக உள்ளது" என்றார்.

அடுத்து 'ரஸ்னா குளுக்கோஸ் பிளஸ்' என்ற பெயரில் சத்துப் பானத்தை அறிமுகப்படுத்துகிறது ரஸ்னா.