எலிசபெத் ராணி வைர விழா: லண்டனில் கோலாகல கொண்டாட்டம்

லண்டன்: இரண்டாம் எலிசபெத் மகாரணியின் வைரவிழா கொண்டாட்டத்தை ஒட்டி தேம்ஸ் நதியில் நடைபெறும் பிரம்மாண்டமான ஆயிரம் படகுகளின் அணிவகுப்பை காண லட்சக்கணக்கானோர் திரண்டுள்ளனர்.

இங்கிலாந்து ராணி இரண்டாம் எலிசபெத் முடி சூட்டிக்கொண்ட 60-ம் ஆண்டு நிறைவு வைர விழா கொண்டாட்டம் சனிக்கிழமை லண்டனில் தொடங்கியுள்ளது. இதனையொட்டி லண்டன் விழாக்கோலம் பூண்டுள்ளது. இங்கிலாந்து ராணி இரண்டாம் எலிசபெத் (வயது 86), தனது தந்தை மன்னர் ஆறாம் ஜார்ஜ் மறைவை தொடர்ந்து 1952-ம் ஆண்டு பிப்ரவரி மாதம் 6-ந் தேதி பட்டத்துக்கு வந்தார். அவருக்கு 1953-ம் ஆண்டு ஜுன் மாதம் 2-ந் தேதி, வின்ஸ்டன் சர்ச்சில் பிரதமராக இருந்த காலகட்டத்தில் ராணி இரண்டாம் எலிசபெத்துக்கு முடி சூட்டப்பட்டது. சனிக்கிழமை அவர் முடிசூட்டிக்கொண்ட 60-வது ஆண்டு நிறைவு நாள் ஆகும். இதையொட்டி வைர விழா கொண்டாட்டங்கள் சனிக்கிழமை தொடங்கி செவ்வாய்க்கிழமை வரை கொண்டாடப்படுகின்றன.

ராணியின் வைர விழாவையொட்டி லண்டன் மாநகரம் களை கட்டி உள்ளது. வீதிகள் எங்கும் தேசியக்கொடிகள் பறக்க விடப்பட்டுள்ளன. அலங்கார விளக்குகள் தொங்க விடப்பட்டுள்ளன. வீதிகளில் மக்கள் மகிழ்ச்சியுடன் கூடி, ராணியின் வைர விழாவை கோலாகலமாக கொண்டாடி வருகின்றனர்.

ராணி முடிசூட்டிக் கொண்ட வைர விழா தொடங்கி விட்டது என்பதற்கு அடையாளமாக ஹாம்ப்ஷயரில் எச்எம்எஸ் டைமண்ட் போர்க்கப்பலில் இருந்து 21 முறை விண்ணை நோக்கி துப்பாக்கியால் சுட்டு ராணிக்கு மரியாதை செலுத்தப்பட்டது. ராணி எலிசபெத்துக்கு இங்கிலாந்து பிரதமர் டேவிட் கேமரூன், காண்டர்பரி ஆர்ச் பிஷப் டாக்டர் ரோவன் வில்லியம்ஸ் புகழாரம் சூட்டினர்.

வைர விழா கொண்டாட்டத்தையொட்டி சனிக்கிழமை ராணி எலிசபெத் திறந்தவெளி காரில் உலா வந்தார். தினந்தோறும் பல்வேறு நிகழ்ச்சிகளுக்கு ஏற்பாடு செய்யப்பட்டுள்ளது. ஞாயிற்றுக்கிழமை தேம்ஸ் நதியில் ஆயிரம் படகுகளின் அணிவகுப்பு நடைபெறுகிறது. திங்கட்கிழமை பக்கிங்ஹாம் அரண்மனையில் மாபெரும் பாப் இசை விருந்துக்கு ஏற்பாடு செய்யப்பட்டுள்ளது. செவ்வாய்க்கிழமை செயின்ட் பால் கதீட்ரல் தேவாலயத்தில் சிறப்பு பிரார்த்தனையுடன் விழா நிறைவு பெறுகிறது.

இங்கிலாந்து அரச குடும்பத்தில் மிக அதிக வயது வாழ்ந்து வருகிற பெருமையும் எலிசபெத் ராணிக்கு கிடைத்துள்ளது. இதன் காரணமாகவே லட்சக்கணக்கானோர் தங்களின் குடும்ப விழா போல இதனை கொண்டாடி வருகின்றனர் என்பது குறிப்பிடத்தக்கது.

English summary

A flotilla of 1,000 boats will sail London’s River Thames on Sunday in a spectacular highlight of four days of nationwide celebrations marking Queen Elizabeth’s 60 years on the throne.