ஷீலா தீட்சித்துக்கு எதிராக போட்டியிட கெஜ்ரிவால் முடிவு

டெல்லி: டெல்லி சட்டசபைத் தேர்தலில் முதல்வர் ஷீலா தீட்சித்தை எதிர்த்துப் போட்டியிடுகிறார் அரவிந்த் கெஜ்ரிவால்.

இதுதொடர்பாக இன்று நடந்த கெஜ்ரிவாலின் ஆம் ஆத்மி கட்சியின் கூட்டத்தில் முடிவு செய்யப்பட்டது. நடைபெறவிருக்கிற டெல்லி சட்டசபைத் தேர்தலில் காங்கிரஸையும், பாஜகவையும் தீவிரமாக எதிர்த்துப் பிரசாரம் செய்வது என்று இந்தக் கூட்டத்தில் தீர்மானிக்கப்பட்டது. ஷீலாவை எதிர்த்து கெஜ்ரிவால் போட்டியிடுவது என்றும் முடிவு செய்யப்பட்டது.

கூட்டத்துக்குப் பின்னர் கெஜ்ரிவால் செய்தியாளர்களிடம் பேசுகையில், புதுடெல்லி தொகுதியில்நான் ஷீலாவை எதிர்த்துப் போட்டியிடவுள்ளேன். ஒரு வேளை எனக்குப் பயந்து வேறு தொகுதிக்கு ஷீலா மாறினால் நானும் மாறி அங்கு போட்டியிடுவேன் என்றார்.

கடந்த 1998ம் ஆண்டு முதல் டெல்லி சட்டசபைத் தேர்தலில் போட்டியிட்டு வருகிறார் ஷீலா. 98ல் அவர் கோல் மார்க்கெட் தொகுதியில் போட்டியிட்டு பாஜக வேட்பாளர் கீர்த்தி ஆசாத்தை தோற்கடித்தார். பின்னர் அடுத்து நடந்த தேர்தலில் பூனம் ஆசாத்தை பெருவாரியான வாக்கு வித்தியாசத்தில் வீழ்த்தினார்.

தற்போது கோல் மார்க்கெட் தொகுதி நீக்கப்பட்டு விட்டது. இதனால் கடந்த தேர்தலில் புதுடெல்லி தொகுதியில் ஷீலா போட்டியிட்டு பாஜகவின் விஜய் கோயலை வீழ்த்தினார். இத்தொகுதியில்தான் வருகிற தேர்தலில் கெஜ்ரிவால் நிற்கப் போவதாக அறிவிக்கப்பட்டுள்ளது.

English summary

Arvind Kejriwal on Sunday set the ball rolling for a direct electoral fight with Sheila Dikshit in the coming Delhi Assembly elections choosing to contest from the constituency where the Delhi Chief Minister will file her nomination. At a convention of Aam Aadmi Party (AAP) workers, Mr Kejriwal also chose to attack BJP, saying the party fielded weak candidates against Ms Dikshit in the previous polls and challenged Vijay Goel to contest against him and Ms Dikshit.