நடிகை பலாத்காரம்: வெயிட் பண்ணுங்க..சொல்லும் போது வாங்க.. நட்ட நடுரோட்டில் சீமானை தவிக்க விட்ட போலீஸ்

Updated: Friday, February 28, 2025, 21:09 [IST]

Subscribe to Oneindia Tamil

சென்னை: நடிகை பலாத்கார வழக்கில் விசாரணைக்கு ஆஜராக வந்த நாம் தமிழர் கட்சியின் தலைமை ஒருங்கிணைப்பாளர் சீமானை தாமதமாக வர வேண்டும் என போலீசார் உத்தரவிட்டதால் நடு சாலையிலேயே சீமான் தத்தளித்துக் கொண்டு காத்திருந்தார்.

சென்னை உயர்நீதிமன்றத்தின் உத்தரவின் பேரில் நடிகை பலாத்கார வழக்கை சென்னை வளசரவாக்கம் போலீசார் விசாரித்து வருகின்றனர். பெங்களூரில் உள்ள நடிகையிடம் ஏற்கனவே வாக்குமூலம் பெற்றிருந்தது போலீஸ். இதனைத் தொடர்ந்து சீமானையும் விசாரணைக்கு ஆஜராக சம்மன் அனுப்பியது போலீஸ்.

ஆனால் விசாரணைக்கு வருவதற்கு சீமான் தரப்பு அவகாசம் கேட்டது. இதனை நிராகரித்த போலீசார் இன்று விசாரணைக்கு ஆஜராக உத்தரவிட்டது. இதனால் வேறுவழியே இல்லாமல் சென்னை வளசரவாக்கம் காவல் நிலையத்தில் ஆஜராகவும் சீமான் ஒப்புக் கொண்டார்.

சேலத்தில் இருந்து சென்னை வந்த சீமான் நேராக வடபழனியில் உள்ள நட்சத்திர விடுதிக்கு சென்றார். அங்கு தமது வழக்கறிஞர்களுடன் ஆலோசனை நடத்தினார். அப்போது, இரவு 8 மணிக்கு மேல் சீமானை விசாரணைக்கு வரலாம் என போலீசார் தகவல் அனுப்பினர். இதனால் சீமானும் 8 மணிக்கு மேல் புறப்பட்டு வளசரவாக்கம் காவல் நிலையத்துக்கு சென்று கொண்டிருந்தார்.

அப்போது திடீரென போலீசார் தரப்பில் நாங்கள் சொல்லும் போது வரவும்.. அதுவரை காத்திருங்கள் என்கிற தகவல் கொடுக்கப்பட்டது. இதனால் வடபழனி ஏவிஎம் ஸ்டுடியோ அருகே உள்ள சாலையில் சீமான் வாகனம் நிறுத்தப்பட்டது. அதே இடத்தில் சீமான் தொடர்ந்து காத்திருந்தார். அத்துடன் நீண்ட நேரம் யாருடனோ சீமான் தொலைபேசியில் பேசிக் கொண்டிருந்தார் சீமான்.

இன்னொரு பக்கம், சீமான் ஆஜராக வருவதால் வளசரவாக்கம் காவல் நிலையத்தின் அருகே நாம் தமிழர் கட்சியினர் பெரும் எண்ணிக்கையில் திரண்டனர். அத்துடன் திடீரென சாலை மறியலிலும் ஈடுபட்டனர். அங்கு அசம்பாவிதங்கள் எதுவும் நடைபெறாத வகையில் நூற்றுக்கணக்கான போலீசார் குவிக்கப்பட்டுள்ளனர். அத்துடன் காவல் நிலையம் அருகே தடுப்புகளும் போடப்பட்டுள்ளன. இதனால் வளசரவாக்கம் காவல் நிலைய பகுதியில் பதற்றமான சூழ்நிலை நிலவியது.

முன்னதாக நேற்று சீமான் வீட்டில் போலீசார் சம்மன் ஒட்டியபோது, அது கிழிக்கப்பட்டது. இது தொடர்பாக சீமானின் காவலாளர் உட்பட 2 பேர் கைது செய்யப்பட்டனர் என்பதும் குறிப்பிடத்தக்கது.