விஜய்க்கு வெள்ளி கிரீடம், காலணியை பரிசாக கொடுக்க! நீலாங்கரை வீட்டில் பெங்களூர் ரசிகர் காத்திருப்பு

Updated: Monday, April 20, 2026, 13:16 [IST]

Subscribe to Oneindia Tamil

சென்னை: வெள்ளி கிரீடம், காலணியை விஜய்க்கு வழங்குவதற்காக அவரது நீலாங்கரை வீட்டு வாசலில் பெங்களூர் ரசிகர் ஒருவர் காத்திருக்கிறார். அதன் மதிப்பு 2 லட்சம் ரூபாய் என சொல்லப்படுகிறது.

தமிழக வெற்றி கழகம் (தவெக) தலைவரும் பிரபல நடிகருமான விஜயை நேரில் சந்தித்து தனது அன்பையும் மரியாதையையும் தெரிவிக்க, பெங்களூரைச் சேர்ந்த 28 வயது தீவிர ரசிகர் ஆகாஷ் வர்மா மணிக்கணக்கில் சென்னை நீலாங்கரை பகுதியில் உள்ள விஜயின் இல்லம் முன்பு காத்திருக்கிறார்.

ஆகாஷ் வர்மா கையில் சுமார் ரூ.2 லட்சம் மதிப்பிலான தங்க வேலைப்பாடு கொண்ட வெள்ளி கிரீடம் மற்றும் நேர்த்தியான காலணி உள்ளன. இந்த பரிசுகளை பெங்களூரில் உள்ள புகழ்பெற்ற ஆபரண கலைஞரிடம் சிறப்பு ஆர்டர் கொடுத்து தயாரித்ததாக அவர் தெரிவித்தார்.

கர்நாடகாவில் ஒரு தனியார் நிறுவனத்தில் மென்பொருள் பொறியாளராக பணியாற்றும் ஆகாஷ், நேற்று காலை சென்னைக்கு ரயிலில் வந்தார். நேரடியாக நீலாங்கரை சென்று காத்திருக்கிறார். அவரது ரசிகர் அர்ப்பணிப்பை நண்பர்கள் படம் பிடித்து சமூக வலைதளங்களில் பதிவிட்டதால் வீடியோ வைரலாகி உள்ளது.

"விஜய் அண்ணன் அரசியலில் நுழைந்து சாமானிய மக்களுக்காக குரல் கொடுக்கிறார். அதை கௌரவிக்கும் விதமாகவே இந்த பரிசுகளை தயார் செய்தேன். அவரை சந்திக்காமல் திரும்ப மாட்டேன்." என ஆகாஷ் வர்மா, தெரிவித்தார்.

விஜயின் பாதுகாப்பு அதிகாரிகள் ஆரம்பத்தில் அனுமதி மறுத்தனர். ஆனால் ஆகாஷின் நிலையான காத்திருப்பை கண்ட உள்ளூர் ரசிகர் கழக உறுப்பினர்கள் அவருக்கு ஆதரவு தெரிவித்து உணவும் தண்ணீரும் கொண்டு வந்து உதவி வருகின்றனர். வீட்டு வாசல் பகுதியில் படிப்படியாக ரசிகர்கள் கூட்டம் அதிகரித்து வருகிறது.

இந்த சம்பவம் குறித்து அரசியல் ஆய்வாளர்கள் தெரிவிக்கையில், "விஜய் ஒரு நடிகர் என்ற அளவிலிருந்து அரசியல் தலைவராக மாறியிருக்கிறார். ரசிகர்களின் இந்த அர்ப்பணிப்பு அவரது மக்கள் செல்வாக்கை நன்கு காட்டுகிறது" என்றார்கள்.

கட்சி வட்டாரங்கள் தரப்பில் இதுவரை எந்த அதிகாரப்பூர்வ அறிவிப்பும் வெளியிடப்படவில்லை. ஆகாஷின் காத்திருப்பு எப்படி முடியும் என்று ரசிகர்கள் ஆவலுடன் எதிர்பார்க்கின்றனர்.

விஜய்க்கு பிரச்சாரத்திற்கு செல்லும் இடத்தில் எல்லாம் வெள்ளி, பித்தளை வேல் பரிசாக கொடுக்கப்படுகிறது. அது போல் வாள்களும் கொடுக்கப்படுகின்றன. அது போல் ஒரு முறை சங்கீதாவுடன் விஜய் இருக்கும் புகைப்படத்தையும் ரசிகர்கள் கொடுத்தனர் என்பது குறிப்பிடத்தக்கது.