சென்னை உள்பட 4 மாவட்டங்களில் அடுத்த 2 மணி நேரத்திற்கு கனமழை.. வானிலை மையம் எச்சரிக்கை

சென்னை: சென்னையில் 2 மணி நேரத்திற்கு கனமழை தொடரும் என வானிலை மையம் அறிவித்துள்ளது.

தென் மேற்கு பருவமழை இறுதி கட்டத்தை எட்டி வருகிறது. இதனால் தமிழகத்தில் மழைக்கான வாய்ப்பு அதிகரித்துள்ளது. அது போல் காற்றின் வேக மாறுபாடு காரணமாகவும் மழை பெய்து வருகிறது.

நேற்று முன் தினம் சென்னையில் திநகர், நுங்கம்பாக்கம், கோடம்பாக்கம் பகுதிகளில் கனமழை பெய்தது. அது போல் அண்ணா சாலையில் லேசான மழை பெய்தது. திருவல்லிக்கேணி, சூளைமேடு, வடபழனி, எம்எம்டிஏ காலனி, அசோக்நகர், கே கே நகர், வில்லிவாக்கம், அண்ணாநகர், அயனாவரம், பசுமை வழி சாலை பகுதிகளிலும் மழை பெய்தது.

சேத்துப்பட்டு

சேத்துப்பட்டு, கீழ்ப்பாக்கம், அண்ணாநகர் பகுதிகளில் மழை பெய்தது. முகப்பேர், நொளம்பூர், அம்பத்தூர் உள்ளிட்ட பகுதிகளில் இடியுடன் கூடிய லேசான மழை பெய்தது. நேற்றைய தினம் சென்னை மற்றும் புறநகர் பகுதிகளில் வெயிலின் தாக்கம் குறைவாகவே இருந்தது.

வெயில் தாக்கம்

இந்த நிலையில் இன்றைய தினமும் காலை முதலே வெயில் இல்லாமல் இருந்தது. இதையடுத்து மாலை 3 மணிக்கு மேல் இடியுடன் கூடிய மழை பெய்து வருகிறது. கிண்டி, திநகர், அசோக் நகர், ஈக்காட்டுத்தாங்கல், வேளச்சேரி, அண்ணாசாலை, நுங்கம்பாக்கம், கோடம்பாக்கம், வடபழனி, கோயம்பேடு, விரும்கபாக்கம், சாலிகிராமம், ராயப்பேட்டை, மயிலாப்பூர், அண்ணாநகர், முகப்பேர், அம்பத்தூர் உள்ளிட்ட பகுதிகளில் கனமழை பெய்து வருகிறது.

புறநகர் பகுதிகள்

அது போல் புறநகர் பகுதிகளான பூந்தமல்லி, மாங்காடு, செங்குன்றம், பாடி உள்ளிட்ட பகுதிகளிலும் மழை வெளுத்து வாங்கி வருகிறது. இதனால் சாலைகளில் தண்ணீர் தேங்கி காட்சியளிக்கிறது. சென்னையில் ஆங்காங்கோ மழைநீர் வடிகால் பணிகள் நடைபெறும் பகுதிகளில் மழையால் சேரும் சகதியுமாக சாலை இருக்கிறது. இதனால் வாகன ஓட்டிகள் அவதியுறுகிறார்கள்.

2 மணி நேரத்திற்கு கனமழை

சென்னை, திருவள்ளூர், காஞ்சிபுரம், ராணிப்பேட்டை உள்ளிட்ட மாவட்டங்களில் அடுத்த இரு மணி நேரத்திற்கு கனமழை நீடிக்கும். அது போல் தமிழகத்தில் மேலும் 2 நாட்களுக்கு கனமழை தொடரும் என வானிலை மையம் தெரிவித்துள்ளது. சென்னையில் லேசான மழையே இருக்கும் என சொல்லப்பட்ட நிலையில் தற்போது கனமழை பெய்யும் என்ற அறிவிப்பையொட்டி பலர் அலுவலகங்களில் இருந்து விரைந்து வீடு திரும்ப கிளம்பி வருகிறார்கள்.

English summary

Chennai Meteorological Department says that Chennai and 3 more districts will get heavy rainfall for 2 hours.