மாஸான BMW கார்! இன்ப அதிர்ச்சி தந்த சென்னை ஐடி நிறுவனம்! மகிழ்ச்சியின் உச்சத்திற்கே சென்ற ஊழியர்கள்

Updated: Saturday, April 9, 2022, 13:29 [IST]

Subscribe to Oneindia Tamil

சென்னை: சுமார் 10 ஆண்டுகளாக தன்னுடன் பணியாற்றிய 5 ஊழியர்களுக்கு பிஎம்டபிள்யூ சொகுசு காரை பரிசாக அளித்து, தனது ஊழியர்களுக்கு இன்ப அதிர்ச்சி கொடுத்துள்ளார் சென்னை ஐடி நிறுவன உரிமையாளர்!

சென்னை ஐடி நிறுவனம்

இந்த நிறுவனத்தின் தலைமை செயல் அதிகாரியும், நிறுவனருமாக சுரேஷ் சம்பந்தம் உள்ளார். இந்த நிறுவனம் தொடங்கி 10 ஆண்டுகளில் இந்த நிறுவனம் வருவாய் தொடர்பான மென்பொருள் துறையில் டாப் நிறுவனங்களில் ஒன்றாக உருவெடுத்துள்ளது. இந்த நிறுவனத்தின் 10வது ஆண்டு விழா நேற்றைய தினம் கொண்டாடப்பட்டது. அதில் சிஇஓ சுரேஷ் சம்பந்தம் தன்னுடன் பணியாற்றிய ஊழியர்களுக்கு இன்ப அதிர்ச்சி கொடுத்தார்.

பிஎம்டபிள்யூ சொகுசு கார்

இந்நிலையில், நிறுவனம் தொடங்கியது முதல் தன்னுடன் இணைந்து பயணித்து, நிறுவனத்தை டாப் இடத்திற்குக் கொண்டு செல்ல உதவிய 5 பேருக்கு சுமார் ஒரு கோடி மதிப்பிலான பிஎம்டபிள்யூ சொகுசு காரை சுரேஷ் சம்பந்தம் பரிசாக அளித்துள்ளார். ஆதி, விவேக், கெளசிக்ராம், பிரசன்னா, தினேஷ் ஆகிய ஐந்து பேருக்கு பிஎம்டபிள்யூ சொகுசு கார் வழங்கப்பட்டுள்ளது.

இன்ப அதிர்ச்சி

நிறுவனத்தின் 10ஆவது ஆண்டு விழாவைக் கொண்டாடும் வகையில் விழா நடப்பதாகவும் அதற்கு குடும்பத்துடன் வர வேண்டும் என்றும் தெரிவித்துள்ளனர். அதன்படி விழாவுக்கு குடும்பத்துடன் வந்த இவர்களிடம் திடீரென பிஎம்டபிள்யூ சொகுசு காரை பரிசாக அளித்து திக்குமுக்காடச் செய்துள்ளார் சுரேஷ் சம்பந்தம்! குடும்பத்தோடு வந்து காரை பெற்ற ஊழியர்கள் மகிழ்ச்சியின் உச்சத்திற்கே சென்றுவிட்டனர்.

பெருமிதம்

இவர்கள் 5 பேரும் நிறுவனம் தொடங்கியதில் இருந்து அனைத்து ஏற்ற இறக்கத்திலும் தன்னோடு பயணித்ததாகவும் வேறு நிறுவனங்கள் அதிக சம்பளம் தருவதாகக் கூறிய போதும் அங்குச் செல்லாமல் தன்னுடனேயே இணைந்து பயணித்ததாகவும் சுரேஷ் சம்பந்தம் குறிப்பிட்டார். இந்தச் சம்பவம் அங்கு வந்த அனைவருக்கும் பெரும் நெகிழ்ச்சியை ஏற்படுத்தியது.

மகிழ்ச்சி

கல்லூரி படிப்பை முடித்து விட்டு அனுபவம் இல்லாமல் நிறுவனத்தில் இணைந்ததாகக் குறிப்பிட்ட காரை பெற்ற ஊழியர்களில் ஒருவரான விவேக், 10 ஆண்டுகள் ஒன்றாக உழைத்ததற்கு கார் பரிசாக அளித்துள்ளது மிகுந்த மகிழ்ச்சியை அளிப்பதாகக் குறிப்பிட்டார். இந்த குறிப்பிட்ட பிஎம்டபிள்யூ மாடல் காரை வாங்க வேண்டும் என்பது தனது கனவாக இருந்ததாகவும் அதைத் தனது சிஇஓ நனவாக்கி உள்ளதாகவும் மற்றொரு ஊழியரான ஆதி தனது மகிழ்ச்சியைப் பகிர்ந்து கொண்டார்.