‛‛நேரில் வாங்க’’.. அறநிலையத்துறை செயலர், ஆணையர் ஆஜராக ஹைகோர்ட் உத்தரவு.. அவமதிப்பு வழக்கில் அதிரடி

சென்னை: பதவி உயர்வு வழங்காததை எதிர்த்து தொடரப்பட்ட நீதிமன்ற அவமதிப்பு வழக்கில் இந்து சமய அறநிலையத்துறை செயலாளர் மற்றும் ஆணையர் நேரில் ஆஜராகி விளக்கமளிக்க சென்னை உயர்நீதிமன்றம் உத்தரவிட்டுள்ளது.

தமிழ்நாடு இந்து அறநிலையத்துறையில் இணை ஆணையராக பணியாற்றியவர் ஞானசேகரன். இவருக்கு பதவி உயர்வு பெற தகுதியிருந்தும் கூடுதல் ஆணையராக நியமனம் செய்யப்படவில்லை. இதையடுத்து அவர் சென்னை உயர்நீதிமன்றத்தில் வழக்கு தொடர்ந்தார்.

ஞானசேகரனுக்கு பதவி உயர்வு வழங்க நீதிமன்றம் உத்தரவிட்டது. ஆனாலும் அவருக்கு பதவி உயர்வு என்பது வழங்கப்படவில்லை. இதற்கிடையே ஞானசேகரன் ஓய்வும் பெற்றார். இந்நிலையில் தான் ஓய்வு பெற்ற அறநிலையத்துறை இணை ஆணையர் ஞானசேகரன் சென்னை உயர்நீதிமன்றத்தில் நீதிமன்ற அவமதிப்பு வழக்கு தொடர்ந்தார்.

அதில் தமிழ்நாடு அரசு பணியாளர்கள் தேர்வாணையம் மூலமாக 1996ம் ஆண்டு அறநிலையத்துறையின் உதவி ஆணையராக நியமிக்கப்பட்டதாகவும், பின்னர் 2005ல் துணை ஆணையராகவும், 2010ல் இணை ஆணையராகவும், 2015ல் கூடுதல் ஆணையராகவும் பதவி உயர்வு வழங்கப்பட்டது.

இந்நிலையில், கூடுதல் பதவி உயர்வு பெற உரிய கல்வித் தகுதிகள் இருந்தும் 2016ல் மீண்டும் இணை ஆணையராக பணியில் அமர்த்தப்பட்டேன். தன்னுடன் பணிபுரிந்த வாசுநாதன் மற்றும் திருமகள் ஆகியோர் கூடுதல் ஆணையர்களாக நியமிக்க கூடுதல் தலைமை செயலாளர் உத்தரவிட்டார்.

இதை எதிர்த்து தொடரப்பட்ட வழக்கை விசாரித்த சென்னை உயர்நீதிமன்றம், கூடுதல் ஆணையராக நியமிக்க உத்தரவிட்டும் எந்த நடவடிக்கை எடுக்கவில்லை என நீதிமன்ற அவமதிப்பு வழக்கு தொடர்ந்தார். மேலும் அதில், இணை ஆணையராகவே பணியில் இருந்து ஓய்வு பெற்றதால், கூடுதல் ஆணையராக பதவி உயர்வு அளித்து, அதற்கான பணபலன்களை அளிக்க உத்தரவிட வேண்டும் என குறிப்பிட்டுள்ளார்.

இந்த வழக்கை விசாரித்த நீதிபதி பட்டூ தேவானந்த், இந்த சமய அறநிலையத்துறை செயலாளர் மற்றும் அறநிலையத்துறை ஆணையர் மார்ச் 15ம் தேதி நீதிமன்றத்தில் நேரில் ஆஜராகி விளக்கமளிக்க வேண்டும் என உத்தரவிட்டு வழக்கை ஒத்திவைத்தார்.

English summary

The Chennai High Court has ordered the Secretary and Commissioner of the Hindu Religious Charities Department to appear and explain in the contempt of court case filed against the non-promotion.