சென்னை மின்தடை.. ஒர்க் ஃப்ரம் ஹோம் முடங்கியது.. ஐடி ஊழியர்களை அலுவலகம் வரச் சொல்லும் நிறுவனங்கள்
சென்னை: சென்னையில் தொடரும் கடுமையான மின்தடை பிரச்சனை ஐடி துறையை முழுமையாக பாதித்துள்ளது. கொரோனா காலத்துக்குப் பின் பெரும்பாலான நிறுவனங்கள் அளித்த வீட்டிலிருந்து வேலை (Work From Home) வசதி இப்போது முற்றிலும் செயலிழந்து போன நிலை உருவாகியுள்ளது. புதிய அரசு பொறுப்பேற்ற சில வாரங்களிலேயே மின்சார நெருக்கடி உச்சமடைந்திருப்பது பொதுமக்களிடையே பெரும் அதிருப்தியை ஏற்படுத்தியுள்ளது.
கடந்த ஒரு மாதமாகவே சென்னையில் நள்ளிரவு மற்றும் பகல் நேரங்களில் தொடர் மின்வெட்டு ஏற்பட்டு வருகிறது. வியாசர்பாடி, பெரம்பூர், சூளைமேடு, மடிப்பாக்கம், அம்பத்தூர், ஈசிஆர் உள்ளிட்ட பல்வேறு குடியிருப்புப் பகுதிகளில் தினசரி 3 முதல் 5 மணி நேரம் வரை மின்சாரம் துண்டிக்கப்படுவதால் மக்கள் கடும் சிரமத்துக்கு ஆளாகியுள்ளனர். 40 டிகிரி செல்சியஸைத் தாண்டும் கோடை வெயிலில் இரவு முழுவதும் தூக்கமின்றி தவிக்கும் நிலை ஏற்பட்டுள்ளது. இதனால் மக்களின் அன்றாட வாழ்க்கை மட்டுமல்லாமல், தகவல் தொழில்நுட்பத் துறையில் பணியாற்றும் லட்சக்கணக்கான ஊழியர்களின் தொழில் வாழ்க்கையும் பெரிதும் பாதிக்கப்பட்டுள்ளது.
கொரோனா பிறகு பல ஐடி நிறுவனங்கள் ஊழியர்களுக்கு வாரம் முழுவதும் அல்லது சில நாட்கள் வீட்டிலிருந்து வேலை செய்யும் சலுகையை வழங்கி வந்தன. இந்த முறை பலரது வாழ்க்கை முறையையே மாற்றியது. ஆனால் தற்போதைய மின்தடை இந்த அமைப்பை முழுமையாக சீர்குலைத்துவிட்டது.
இரவு நேர மின்வெட்டு காரணமாக ஊழியர்கள் தூக்கமின்றி களைப்புடன் எழுந்து, பகல் நேரத்தில் மீண்டும் மின்சாரம் போவதால் இன்வெர்ட்டர்கள் செயலிழக்கின்றன. வைஃபை இணைப்பு துண்டிக்கப்படுவதால் வெளிநாட்டு கிளையண்ட்களுடன் நடக்கும் முக்கிய ஆன்லைன் மீட்டிங்களில் பங்கேற்க முடியாமல் போகிறது. இதனால் பலரது உற்பத்தித் திறன் 30 முதல் 40 சதவீதம் வரை குறைந்துள்ளதாக நிறுவனங்கள் தெரிவித்துள்ளன.
இந்த நிலையில் தரமணி, ஓஎம்ஆர், அம்பத்தூர் உள்ளிட்ட ஐடி பூங்காக்களில் உள்ள பல முன்னணி நிறுவனங்கள் ஊழியர்களுக்கு அதிரடி உத்தரவு பிறப்பித்துள்ளன. "வீடுகளில் மின்சாரப் பற்றாக்குறை மற்றும் இணையப் பிரச்சனை காரணமாக பணிகள் பாதிக்கப்படுகின்றன. எனவே தற்காலிகமாக வீட்டிலிருந்து வேலை முறையை நிறுத்திவிட்டு அனைவரும் அலுவலகத்துக்கு நேரில் வந்து பணியாற்ற வேண்டும்" என அறிவிக்கப்பட்டுள்ளது. இந்த உத்தரவு ஊழியர்களிடையே பெரும் அதிர்ச்சியை ஏற்படுத்தியுள்ளது.
போக்குவரத்து நெரிசல், பயண நேரம் அதிகரிப்பு, எரிபொருள் செலவு உள்ளிட்ட பல சிரமங்களை எதிர்கொள்ள வேண்டியிருப்பதாக ஊழியர்கள் வேதனை தெரிவிக்கின்றனர். "மின்தடையை சரிசெய்ய வேண்டியது அரசின் பொறுப்பு. அதை விட்டுவிட்டு எங்களை அலுவலகம் வரச் சொல்வது கூடுதல் சுமையைத் தருகிறது" என அவர்கள் கூறுகின்றனர்.
மின்சாரத் துறை அமைச்சர் சி.டி.ஆர். நிர்மல் குமார் மற்றும் டி.என்.இ.பி தலைவர் ஜெ. ராதாகிருஷ்ணன் ஆகியோர் தொடர் ஆய்வுகளை மேற்கொண்டு வருகின்றனர். அதிகப்படியான ஏசி பயன்பாடு, மின் மாற்றிகள் மற்றும் கேபிள்கள் பழுதடைதல், மெட்ரோ மற்றும் குடிநீர் பணிகளின்போது நிலத்தடி கேபிள்கள் துண்டிப்பு ஆகியவை மின்வெட்டுக்குக் காரணம் என அதிகாரிகள் விளக்கியுள்ளனர். மின் உற்பத்தியில் பற்றாக்குறை இல்லை எனவும் அவர்கள் தெரிவித்துள்ளனர்.
எனினும் பொதுமக்கள் மற்றும் ஐடி ஊழியர்கள் மின்தடையை உடனடியாகத் தீர்க்க வேண்டும் என வலியுறுத்துகின்றனர். முதலமைச்சர் சி. ஜோசப் விஜய் தலைமையிலான அரசு இந்தப் பிரச்சனையை போர்க்கால அடிப்படையில் தீர்த்து, மக்களின் தூக்கத்தையும் தொழில் வாய்ப்புகளையும் பாதுகாக்க வேண்டும் என்பது தற்போதைய முக்கிய கோரிக்கையாக உள்ளது. சென்னையின் வளர்ச்சியில் முக்கியப் பங்கு வகிக்கும் ஐடி துறையின் சீரான செயல்பாட்டுக்கு மின்சார விநியோகம் இன்றியமையாதது என்பதை அரசு உணர்ந்து உரிய நடவடிக்கை எடுக்க வேண்டும்.
இந்த மின்தடை பிரச்சனை நீண்ட நாட்களுக்கு நீடித்தால் ஐடி நிறுவனங்கள் வேறு மாநிலங்களுக்கு இடம் மாறும் அபாயமும் உள்ளது. எனவே அரசு உடனடியாக தீர்வு காண வேண்டியது அவசியம்.
Click it and Unblock the Notifications
Sign in with Google