வாஜ்பாய் ஆட்சியை கவிழ்த்த அதிமுகவுடன் பாஜக கூட்டணி ஏன்? பிரதமருக்கு முதல்வர் ஸ்டாலின் கேள்வி

உங்களில் ஒருவன் நிகழ்ச்சியில் வாஜ்பாய் ஆட்சியை கவிழ்த்த அதிமுகவுடன் பாஜக கூட்டணி வைத்தது ஏன் என முதல்வர் ஸ்டாலின் கேள்வி

Updated: Tuesday, February 14, 2023, 10:38 [IST]

Subscribe to Oneindia Tamil

சென்னை: வாஜ்பாய் ஆட்சியை கவிழ்த்த அதிமுகவுடன் பாஜக கூட்டணி ஏன் என உங்களில் ஒருவன் நிகழ்ச்சியில் முதல்வர் ஸ்டாலின் கேள்வி எழுப்பியுள்ளார்.

உங்களில் ஒருவன் என்ற பகுதியில் மக்களின் கேள்விகளுக்கு முதல்வர் ஸ்டாலின் பதில் அளித்துள்ளார். அந்த வகையில் அவர் நாடாளுமன்றத்தில் பிரதமர் மோடி பேசியதில் மக்களுக்கான எதுவுமே இல்லை. பிரதமர் பதில் உரையிலும் வார்த்தை ஜாலம் மட்டுமே இருந்தது.

பிபிசி ஆவணப்படம் , அதானி விவகாரம் போன்ற சர்ச்சைகளுக்கு பிரதமர்பதில் அளிக்கவில்லை. திமுக எம்பிக்களின் கேள்விகளுக்கு பிரதமர் பதில் சொல்லவில்லை என்றும் விமர்சனம் எழுந்துள்ளது.

காங்கிரஸ்

திமுக ஆட்சியை காங்கிரஸ் கலைத்தது என்றும் அந்த கட்சியுடன் திமுக கூட்டணி வைத்துள்ளது ஏன் என்றும் பிரதமர் கேள்வி எழுப்பியுள்ளார். அவரை நான் ஒன்று கேட்கிறேன் "வாஜ்பாய் ஆட்சியை கவிழ்த்த அதிமுகவுடன் பாஜக கூட்டணி ஏன்?" என கேள்வி எழுப்பியுள்ளார்.

தூத்துக்குடியில் போராடியவர்கள்

தூத்துக்குடியில் போராடியவர்களை துப்பாக்கியால் சுடச் சொல்லிவிட்டு டிவியை பார்த்துதான் தெரிந்து கொண்டேன் என பொய் சொன்னாரே அந்த பழனிசாமியா? அவர் அப்படிதான் பேசுவார். அவர் எங்களை பற்றி பேசுவது வேடிக்கையாக இருக்கிறது. நாங்கள் கொடுத்த வாக்குறுதிகளில் 85 சதவீதத்தை நிறைவேற்றி விட்டோம். சொல்லாத பல திட்டங்களையும் நிறைவேற்றி வருகிறோம்.

புதுமை பெண் திட்டம்

புதுமை பெண் திட்டம் என்பது நாங்கள் தேர்தல் வாக்குறுதியில் சொல்லாத திட்டம். மாணவிகளுக்கு கலங்கரை விளக்கமாக புதுமை பெண் திட்டம் அமைந்துள்ளது என முதல்வர் தெரிவித்தார். எஞ்சிய வாக்குறுதிகளை ஓராண்டுக்குள் நிறைவேற்றி காட்டுவேன். இன்னும் எத்தனை உயிர்கள் பலியானால் ஆன்லைன் ரம்மி சட்டத்திற்கு கையெழுத்து போடுவீர்கள் என ஆளுநர் ஆர்.என்.ரவிக்கு முதல்வர் கேள்வி எழுப்பியுள்ளார்.

ஆக்கப்பூர்வமான அரசியல்

ஆக்கப்பூர்வமான அரசியல் என் பாணி, அவதூறு பரப்புவது எதிர்க்கட்சிகளின் பாணி. அரசியல் செய்வதற்கான வாய்ப்பை அளிக்கவில்லை என்பதால் எதிர்க்கட்சிகளுக்கு என் மீது கோபம் உள்ளது. சேற்றில் கூட தாமரை மலரும் என பிரதமர் நரேந்திர மோடி கூறியுள்ளார். தண்ணீர், சேறு உள்ள எல்லா இடத்திலும் தாமரை மலராது என முதல்வர் ஸ்டாலின் பதில் அளித்துள்ளார். நாடாளுமன்றத்தில் பட்ஜெட் கூட்டத் தொடரின் போது பிரதமர் நரேந்திர மோடி அதிமுக, திமுக ஆகிய கட்சிகளின் ஆட்சியை 90 முறை காங்கிரஸ் கவிழ்த்துள்ளது. அந்த கட்சியுடன் திமுக கூட்டணி வைக்கலாமா என கேள்வி எழுப்பினார்.