இந்துக்களுக்கு எல்லாம் இலவசமாவா கொடுக்குறீங்க.. பா.ஜ.க.வை ட்வீட் போட்டு கலாய்த்த எம்.பி ஜோதிமணி!

Updated: Thursday, September 2, 2021, 11:47 [IST]

Subscribe to Oneindia Tamil

சென்னை: கொரோனா ஏற்படுத்திய தாக்கத்தில் இருந்து மக்கள் இப்போதுதான் ஒரு வழியாக மீண்டு வரும் நிலையில், கடுமையான விலைவாசி உயர்வு மக்களை பாடாய்படுத்தி வருகிறது. ஏற்கனவே பல்வேறு மாநிலங்களில் பெட்ரோல், டீசல் விலை 100 ரூபாயை கடந்து செல்கிறது.

இதனால் வாகன ஓட்டிகள் கடும் சிரமத்தை சந்தித்து வரும் நிலையில், சமையல் எரிவாயு சிலிண்டர் விலை மேலும் ரூ 25 உயர்ந்து அதிர்ச்சியை கொடுக்கிறது. போதாக்குறைக்கு சுங்கச் சாவடிகளில் கட்டணம் உயர்ந்துள்ளது.

ஜோதிமணி ட்வீட்

இந்த தாக்கம் காரணமாக அத்தியாவசிய பொருட்களின் விலை, காய்கறிகள் விலை விண்ணை முட்டும் அளவுக்கு அதிகரித்துள்ளதால் மக்களுக்கு நாலாபுறமும் அதிர்ச்சியை கொடுப்பதாக உள்ளது. சமையல் எரிவாயு சிலிண்டர் விலை உயர்வுக்கு எதிர்ப்பு தெரிவித்து காங்கிரஸ் உள்ளிட்ட எதிர்க்கட்சிகள் தொடர்ந்து போராட்டம் நடத்தி வருகின்றன. இந்த நிலையில் சமையல் எரிவாயு விலை உயர்வை கண்டித்து பா.ஜ.க.வை கலாய்த்து ட்வீட் போட்டுள்ளார் கரூர் காங்கிரஸ் எம்.பி ஜோதிமணி.

பகல்கொள்ளை

இது தொடர்பாக ஜோதிமணி வெளியிட்டுள்ள டுவிட்டர் பதிவில் ''சமையல் எரிவாயு சிலிண்டர் விலை மேலும் ரூ 25 உயர்வு.விரைவில் ரூ.1000 ஆகிவிடும்.சுங்கச் சாவடி கட்டணம் உயர்வு. இரண்டும் ஒரே நாளில். மோடி அரசின் பகல்கொள்ளையை மறைக்கவே #பாலியல்பாஜக இந்து,கடவுள்,தேசம் என்று ஊரை ஏமாற்றிக்கொண்டிருக்கிறது. இந்துக்களுக்கு எல்லாம் இலவசமாகவா தருகிறார்கள்?'' என்று கூறியுள்ளார். சமையல் எரிவாயு விலை உயர்வு, சுங்கச் சாவடிகளில் கட்டணம் உயர்வு ஆகியவை குறித்து பத்திரிகைகளில் வந்த செய்தியையும் அவர் டுவிட்டர் பதிவுடன் இணைத்துள்ளார்.

கே.டி.ராகவன்

கடந்த சில நாட்களுக்கு முன்பு தமிழக பா.ஜ.க பொதுச் செயலாளர் கே.டி.ராகவன் வாட்ஸ்அப் வீடியோ அழைப்பில் பா.ஜ.க.வைச் சேர்ந்த பெண் ஒருவரிடம் தவறாகப் பேசுவது போன்ற வீடியோ சமூக வலைதளம் ஒன்றில் வெளியாகி பெரும் சர்ச்சையை ஏற்படுத்தியது. கே.டி.ராகவன் தனது பதவியை ராஜினாமா செய்தார். இது தொடர்பாக விசாரிக்க பா.ஜ.க குழு அமைத்துள்ளது.

கைது செய்ய வேண்டும்

இந்த விவகாரத்தில் கே.டி.ராகவனுக்கு எதிராக கடுமையாக பொங்கியெழுந்த காங்கிரஸ் எம்.பி ஜோதிமணி, கே.டி.ராகவனை கைது செய்யும்படி தமிழக டி.ஜி.பி சைலேந்திரபாபுவிடம் நேரடியாக மனு கொடுத்தார். பாஜக, அதிமுக உறுப்பினர்கள் தொடர்ந்து பாலியல் குற்றங்களை அரங்கேற்றி வருகின்றனர். அவர்களை கைது செய்த தமிழக பெண்களுக்கு பாதுகாப்பு அளிக்க வேண்டும் என்று ஜோதிமணி மனுவில் கூறி இருந்தது குறிப்பிடத்தக்கது.