நான் சுத்திவளைச்சு பேச விரும்பல! திருமாவளவனிடம் நேரடியாகவே கேட்கிறேன்! நீங்கள் இந்துவா? விடாத பேரரசு

Updated: Wednesday, October 12, 2022, 18:18 [IST]

Subscribe to Oneindia Tamil

சென்னை : திருமாவளவனிடம் நேரடியாகவே கேட்கிறேன். நீங்கள் இந்துவா? இல்லை என்றால் கிறிஸ்தவரா? இல்லை எனக்கு எந்தமதமும் இல்லை நான் நாத்திகர் என்றால் அதையும் வெளிப்படையாகச் சொல்லுங்கள் என இயக்குனரும் பாஜக பிரமுகருமான பேரரசு அறிக்கை வெளியிட்டுள்ளார்.

விடுதலை சிறுத்தைகள் கட்சி தலைவர் தொல்.திருமாவளவன் கடந்த சில நாட்களுக்கு முன் திருமண நிகழ்ச்சி ஒன்றில் பேசுகையில் இந்து சமய அறநிலையத் துறையை சைவ சமய அறநிலையத் துறை என்றும், வைணவ சமய அறநிலையத் துறை என்றும் பிரித்திட வேண்டும் என பேசியிருந்தார்.

மேலும், இவ்விரு சமயங்களையும் இந்து சமயம் என்று ஆக்கியதன் மூலம் அவற்றின் அடிப்படைக் கோட்பாடுகள் நீர்த்துப்போகின்றன. அதாவது, சிவனியம், மாலியம் ஆகியவற்றை வைதிக மத கோட்பாடான சனாதனம் விழுங்கிவிட்டு மேலாதிக்கம் செய்கிறது" என கூறியிருந்தார்.

இயக்குனர் பேரரசு

திருமாவளவனின் இந்த கருத்து பலத்த விவாதங்களை ஏற்படுத்திய நிலையில், பலரும் கருத்து தெரிவித்து வருகின்றனர். அவரது பேச்சுக்கு இயக்குனரும் பாஜக பிரமுகருமான பேரரசு கடும் கண்டனங்களை தெரிவித்திருந்தார். அவர் வெளியிட்ட அறிக்கையில்,"திருமாவளவன் சொல்வதுபோல இந்து மதத்தை சைவம், வைணவம் என்று பிரித்துவிட்டு, தமிழகத்தை சேர, சோழ, பாண்டிய நாடுகள் என்று பிரித்து விடுங்கள். மீண்டும் தெரு பெயர்களோடு சாதிப் பெயரையும் இணையுங்கள்.

திருமாவளவன்

சைவ, வைணவ காலத்தில் கிறிஸ்தவம், இஸ்லாம் இல்லை. அதனால், அந்த மதங்களை இந்தியாவில் இருந்து அகற்றி விடுங்கள். முக்கியமாக அப்போது திராவிடம் என்ற வார்த்தையே தமிழர்களிடம் இல்லை. அதனால் முதலில் அந்த வார்த்தையை எங்குமில்லாமல் செய்துவிடுங்கள். இந்தியாவையும் பாகிஸ்தானையும் இணைத்து விடுங்கள். திருமாவளவன் சொல்வதுபோல நாம், 2000 ஆண்டுகளுக்கு முன் சென்றுவிடுவோம்." என கடுமையாக விமர்சித்து இருந்தார்.

ஆ.ராசா, சீமான்

இந்நிலையில் திருமாவளவனோடு, ஆ.ராசா, சீமான் ஆகியோரையும் பேரரசு விமர்சித்துள்ளார். வைணவம், சைவம் என்ற விஷயங்களை மக்களே மறந்து, இந்து என்ற ஒற்றுமைக்குள் வந்துவிட்டார்கள். சாதி ஒழிய வேண்டும், சமூக நீதி வேண்டும் என்று முற்போக்காக பேசும் திருமாவளவனின் சிந்தனை அதைவிட பிற்போக்காக இப்போது மாறிவிட்டது.

நீங்கள் இந்துவா?

திருமாவளவனிடம் நேரடியாகவே கேட்கிறேன். நீங்கள் இந்துவா? இல்லை என்றால் கிறிஸ்தவரா? இல்லை, எனக்கு எந்தமதமும் இல்லை, நான் நாத்திகர்என்றால் அதையும் வெளிப்படையாகச் சொல்லுங்கள். பிறகு இந்து மதத்தைப் பற்றி ஆராய்ச்சி செய்வதும், கேலி கிண்டல் செய்வதும் இருக்கட்டும். ஆ.ராசா, சீமான் ஆகியோரிடமும் இதையே கேட்கிறேன். நீங்கள் என்ன மதம் என்று தெரியாமல் இந்து மதத்தை இழிவுப்படுத்தக் கூடாது. இதுவரை பொறுத்துக் கொண்டோம். இனி பொறுக்க மாட்டோம்" என அறிக்கை வெளியிட்டுள்ளார்.