பாஜகவுக்கு பணிய கூடாது.. விஜய் இனியாவது மனம் திருந்த வேண்டும்.. ஜவாஹிருல்லாவின் வாழ்த்து + வார்னிங்
சென்னை: "பாசிச கோட்பாடு கொண்ட பாஜகவை விஜய் தனது கொள்கை எதிரி என்று பிரகடனம் செய்துள்ளார். ஆயினும் தேர்தல் பரப்புரைகளிலோ மற்ற கூட்டங்களிலோ பாசிச பாஜகவின் மதவெறி போக்கு குறித்து மவுனம் சாதித்து வந்த விஜய் இனியாவது மனந்திறக்க வேண்டும். பாஜகவுக்கு அணுவளவும் பணிந்து விடாமல், உருட்டல் மிரட்டல்களுக்கெல்லாம் அஞ்சி விடாமல் மதச்சார்பற்ற சகோதரத்துவ சமாதான தமிழகச் சூழலை விஜய் பேணிக்காக்க வேண்டும்" என மனிதநேய மக்கள் கட்சியின் தலைவர் ஜவாஹிருல்லா தெரிவித்துள்ளார்.
தமிழக சட்டசபை தேர்தலில் விஜய்யின் தமிழக வெற்றிக் கழகம் 108 தொகுதிகளில் வெற்றி பெற்றுள்ளது .இதன்மூலம் அடுத்த முதல்வராக விஜய் பொறுப்பேற்பது உறுதியாகி உள்ளது.
இந்நிலையில் தான் விஜய்க்கு அரசியல் கட்சி தலைவர்கள், திரை பிரபலங்கள் என பலரும் வாழ்த்து தெரிவித்து வருகின்றனர்.
இந்நிலையில் தான் திமுக கூட்டணியை சேர்ந்த மனிதநேய மக்கள் கட்சியின் தலைவர் ஜவாஹிருல்லா வெளியிட்டுள்ள அறிக்கையில் கூறியதாவது: "தமிழக சட்டப்பேரவை தேர்தலில் அதிக இடங்களை வென்றுள்ள தமிழக வெற்றிக் கழகத் தலைவர் விஜய்க்கு மனமார்ந்த நல்வாழ்த்துகளை தெரிவித்துக் கொள்கிறேன்.
திராவிட மாடல் திமுக அரசு 2021 முதல் 2026 வரை மிகச் சிறப்பான நல்லாட்சியை மக்களுக்கு தந்தது என்பது மறக்க முடியாத உண்மை. திமுக அரசின் திட்டங்கள் ஒவ்வொரு குடும்பத்தையும் தனி மனிதரையும் பல வழிகளில் சென்றடைந்து பயன் நல்கியுள்ளன.
பாசிச கூடாரமாக மாற்ற..
உயர்கல்வியில் இந்தியாவின் முதல் இடத்தை தமிழ்நாடு அடைவதற்கும் தரமான பள்ளிக்கல்வியை ஏழை, எளிய மக்களின் பிள்ளைகள் பெறுவதற்கும் திமுக அரசு செயல்படுத்திய திட்டங்கள் காரணமாக இருந்தன.தமிழ்நாட்டை இந்திய மாநிலங்களில் இரட்டை இலக்கப் பொருளாதார வளர்ச்சியில் முன்னேற்றியது திமுக ஆட்சி.
மத்திய அரசின் ஆவணங்களே அதற்கு சாட்சி . தமிழ்நாட்டின் மாநில உரிமைகளை பறிப்பதற்கும் பொருளாதாரத்தை நசுக்குவதற்கும் இந்தியை நம் மீது திணிப்பதற்கும் மதவெறி பாசிசக் கூடாரமாக தமிழ்நாட்டை மாற்றுவதற்கும் மத்திய பாஜக அரசு செய்த சூழ்ச்சிகளை ஸ்டாலின் எதிர்த்து நின்றார். மத்திய பாஜக அரசின் ஓயாத இடையூறுகளை மீறியே தமிழ்நாட்டை வளர்ச்சிப் பாதையிலும் நாகரிக அரசியலிலும் அவர் வழி நடத்தி வந்தார் என்பது ஆணித்தனமான உண்மை.
விஜய் மனம் திருந்த வேண்டும்
இப்போது தமிழ்நாட்டு மக்கள் தமிழக வெற்றிக் கழகத்திற்கு அதிக இடங்களில் வெற்றியை தந்துள்ளனர். பாசிச கோட்பாடு கொண்ட பாஜகவை விஜய் தனது கொள்கை எதிரி என்று பிரகடனம் செய்துள்ளார். ஆயினும் தேர்தல் பரப்புரைகளிலோ மற்ற கூட்டங்களிலோ பாசிச பாஜகவின் மதவெறி போக்கு குறித்து மவுனம் சாதித்து வந்த விஜய் இனியாவது மனந்திறக்க வேண்டும்.
பணிந்து விடாமல் அஞ்சாமல் செயல்பட...
மக்கள் நலன் பேணுவதிலும் மாநில உரிமைகளை காப்பதிலும் மதவெறி பாசிச பாஜகவுக்கு அணுவளவும் பணிந்து விடாமல் உருட்டல் மிரட்டல்களுக்கெல்லாம் அஞ்சி விடாமல் மதச்சார்பற்ற சகோதரத்துவ சமாதான தமிழகச் சூழலை பேணிக்காக்க விஜய் முன்னிருக்க வேண்டுமென இந்நேரத்தில் வலியுறுத்துகிறேன். தமிழக வெற்றிக் கழகம் தமிழக நலம் காக்கும் வகையில் பாசிச பாஜகவை முறியடிக்கும் வகையில் தொடர்ந்து செயல்பட வாழ்த்துகிறேன்' எனத் தெரிவித்துள்ளார்.
Click it and Unblock the Notifications
Sign in with Google