"தரையில் விழுந்து புரண்டு".. அங்கே பொதுக்குழு.. இங்கே அதிமுக ஆபிசில் என்ன நடந்தது? கலங்கிய ஓபிஎஸ்!

Updated: Monday, July 11, 2022, 16:40 [IST]

Subscribe to Oneindia Tamil

சென்னை: அதிமுக பொதுக்குழு சென்னை வானகரத்தில் நடைபெற்ற நிலையில் ஓ பன்னீர்செல்வம் அதிமுக அலுவலகத்தில் தீவிர ஆலோசனை நடத்தி வந்தார். அங்கு பல பரபரப்பு சம்பவங்கள் நடைபெற்றன.

உள்ளே சென்றனர்

அங்கே அதிமுக பொதுக்குழு நடப்பதற்கு இடையில் இங்கே ஓ பன்னீர்செல்வம் அதிமுக அலுவலகம் சென்றார். அதிமுக அலுவலகத்திற்கு ஓ பன்னீர்செல்வம் வருவார் என்பதை அறிந்து இன்று காலையே எடப்பாடி பழனிசாமி தனது ஆதரவாளர்களை அங்கே நிறுத்தி இருந்தார். இதனால் எடப்பாடி - ஓ பன்னீர்செல்வம் ஆதரவாளர்கள் இடையே அங்கு மோதல் ஏற்பட்டது. ரத்த காயம் ஏற்படும் அளவிற்கு நிர்வாகிகள் மோதிக்கொண்டனர்.

ஆலோசனை

கடைசியில் ஓ பன்னீர்செல்வம் தரப்பு நிர்வாகிகள் அதிமுக அலுவலகத்திற்கு போடப்பட்டு இருந்த பூட்டை உடைத்து உள்ளே சென்றனர். கடும் மோதலுக்கு இடையில் ஓ பன்னீர்செல்வம் ஆதரவு நிர்வாகிகள் உள்ளே சென்றனர். உள்ளே ஓபிஎஸ் சென்ற 5 நிமிடத்தில் அதிமுக பொதுக்குழுவை நடத்த அனுமதி அளித்து உயர் நீதிமன்றம் உத்தரவிட்டது. இது தொடர்பான தகவல் உடனே ஓ பன்னீர்செல்வத்திடம் தெரிவிக்கப்பட்டது. இதையடுத்து ஓ பன்னீர்செல்வம் உடனே ஆலோசனை மேற்கொண்டார்.

பொதுக்குழு பற்றி அப்டேட்

அடுத்து என்ன செய்வது, சட்ட ரீதியாக என்ன போராட்டங்களை மேற்கொள்வது என்று ஓ பன்னீர்செல்வம் அதிமுக அலுவலகத்தில் இருந்த படியே ஆலோசனை செய்தார். அதோடு இன்னொரு பக்கம் அதிமுக பொதுக்குழு, செயற்குழு சென்னை வானகரத்தில் தொடங்கியது. இதில் எடப்பாடி பழனிசாமி இடைக்கால பொதுச்செயலாளராக நியமிக்கப்பட்டார். இது தொடர்பான அப்டேட்கள் உடனுக்குடன் ஓ பன்னீர்செல்வம் தரப்பிற்கு தெரிவிக்கப்பட்டது.

உருண்டு புரண்ட நிர்வாகிகள்

அதிமுக அலுவலகத்தில் இருந்த படியே பொதுக்குழு குறித்த விவகாரங்களை ஓ பன்னீர்செல்வம் கேட்டறிந்தார். இந்த நிலையில் எடப்பாடி பழனிசாமி பொதுச்செயலாளர் ஆனதை தெரிந்து கொண்டு ஓ பன்னீர்செல்வம் ஆதரவு நிர்வாகிகள் அதிமுக அலுவலகத்தில் கதறி கோஷமிட்டனர். மோசம் செய்துவிட்டனர். இதை ஏற்றுக்கொள்ள முடியாது. தொண்டர்கள் ஆதரவு ஓபிஎஸ்ஸுக்குத்தான் என்று கூறி ஓ பன்னீர்செல்வம் ஆதரவு நிர்வாகிகள் உருண்டு, புரண்டு கோஷம் எழுப்பினார்கள்.

கலங்கினார்

இந்த நிலையில் ஓ பன்னீர்செல்வம் கொஞ்சம் கலக்கமான முகத்துடன் காணப்பட்டார். அவர் காலையில் கடுகடுப்புடன் இருந்த நிலையில்.. அதிமுக அலுவலகத்தில் கொஞ்சம் சோகமான முகத்துடன் காணப்பட்டார். தொடர்ந்து அதிமுக நிர்வாகிகள் ஆதரவை இழந்த ஓ பன்னீர்செல்வம், தற்போது சட்ட ரீதியாகவும் ஆதரவை இழந்துள்ளார். இதன் காரணமாகவே ஓ பன்னீர்செல்வம் கொஞ்சம் கலக்கமான முகத்தோடு காணப்பட்டார்.