அப்பவும் இதேதான்! பாஜகவுக்கு 4- 14 சீட்: 2019-ல் தமிழ்நாடு எக்ஸிட் போல் முடிவுகள் நினைவிருக்கிறதா?

சென்னை: தமிழ்நாட்டில் பாஜக 14 இடங்களில் வெல்லும்; 34% வாக்குகளைப் பெறும் என்றெல்லாம் சில எக்ஸிட் போல் முடிவுகள் தெரிவித்துள்ளதை பாஜகவினரே ஆச்சரியத்துடன் விவாதித்து வருகின்றனர். 2019 லோக்சபா தேர்தலின் போதும் தமிழ்நாட்டில் பாஜகவுக்கு 4 முதல் 14 இடங்கள் வரை கிடைக்கும் என எக்ஸிட் போல் முடிவுகள் தெரிவித்திருந்தது நினைவில் கொள்ளத்தக்கது.

லோக்சபா தேர்தல் வாக்கு எண்ணிக்கை நாளை மறுநாள் நடைபெற உள்ளது. லோக்சபா தேர்தலின் இறுதி கட்ட வாக்குப் பதிவு நிறைவடைந்த உடனேயே தேர்தலுக்குப் பிந்தைய எக்ஸிட் போல் முடிவுகள் வெளியிடப்பட்டன. தமிழ்நாட்டில் பொதுவாக திமுக கூட்டணியே அதிக இடங்களைக் கைப்பற்றும் என எக்ஸிட் போல் முடிவுகள் தெரிவித்துள்ளன. ஆனால் ஒரு சில எக்ஸிட் போல் முடிவுகளில் பாஜகவுக்கு 6 முதல் 14 இடங்கள் கிடைக்கும் என்றெல்லாம் தெரிவிக்கப்பட்டிருந்தன.

2019-ம் ஆண்டு லோக்சபா தேர்தலின் போதும் இதேபோலவே தமிழ்நாட்டில் பாஜக கூட்டணிக்கு 4 முதல் 14 இடங்கள் வரை கிடைக்கும் என எக்ஸிட் போல் முடிவுகள் தெரிவித்திருந்தன

2019-ம் ஆண்டு தேர்தலின் போது தமிழ்நாடு குறித்து வெளியிடப்பட்ட எக்ஸிட் போல் முடிவுகள் என்ன சொன்ன? India Today வெளியிட்டிருந்த எக்ஸிட் போல் முடிவுகளில் பாஜக அணிக்கு 0 முதல் 4 இடங்கள் கிடைக்க வாய்ப்பு என தெரிவித்திருந்தன. Times Now எக்ஸிட் போல் முடிவுகளில் பாஜக கூட்டணிக்கு 9 இடங்கள் என கணிக்கப்பட்டிருந்தன. அதி உச்சமாக தந்தி டிவி எக்ஸிட் போல் முடிவுகளில் பாஜக அணிக்கு 14 இடங்கள் கிடைக்கக் கூடும் என தெரிவிக்கப்பட்டிருந்தது. People Political Predictions வெளியிட்ட எக்ஸிட் போல், பாஜகவுக்கு 4 இடங்கள் கிடைக்கும் என்றது. ஆனால் பாஜக-அதிமுக கூட்டணிக்கு ஒரே ஒரு இடம்தான் கிடைத்தது என்பதுதான் சரித்திரம்.

தேர்தலுக்கு முந்தைய கருத்து கணிப்புகள் இன்னும் ஒருபடி மேலே போய் பாஜக கூட்டணிக்கு 3 முதல் 21 இடங்கள் கிடைக்கும் என கணித்திருந்தன. ஏப்ரல் 2019-ல் Republic TV வெளியிட்ட கருத்து கணிப்பில்தான் பாஜக- அதிமுக கூட்டணி 21 இடங்களில் வெல்லும் என கணித்திருந்தது. தந்தி டிவியின் கருத்து கணிப்பானது 9 முதல் 17 இடங்கள் என தெரிவித்திருந்தது குறிப்பிடத்தக்கது.

English summary

In 2019, Exit Polls Predicted BJP may get 14 Seats in Tamil Nadu. But BJP Alliance got only one seat in Tamil Nadu.