துன்பம் தரும் பாஜகவுடன் நிதிஷ்.. இந்தியா கூட்டணிக்கு நல்லதே! பீகார்தான் பாவம் -அமைச்சர் மனோ தங்கராஜ்
சென்னை: ஐக்கிய ஜனதா தளம் தலைவரும் பீகார் முதலமைச்சருமான நிதிஷ் குமார் பிரிந்தது இந்தியா கூட்டணிக்கு நல்லதுதான் என்றும், ஆனால், பீகார் மக்களை நினைத்தால் வருத்தமாக இருப்பதாகவும் அமைச்சர் மனோ தங்கராஜ் தெரிவித்து உள்ளார்.
இதுகுறித்து எக்ஸ் தளத்தில் அவர் பதிவிட்டு இருப்பதாவது,
"நட்டார்போல் நல்லவை சொல்லினும் ஒட்டார்சொல்
ஒல்லை உணரப் படும் - திருக்குறள்
நண்பர் போல நல்லவற்றைச் சொன்னாலும் பொருந்தாதவர் சொற்கள் உடனே தெரிந்து விடும்
நேற்றைய தினம் முழுக்க பாஜகவின் ஊதுகுழலாக செயல்படும் சில செய்தி ஊடகங்கள் நிதிஷ்குமார் INDIA கூட்டணியிலிருந்து வெளியேறியதை ஊதி பெரிதாக்கி, கூட்டணியே சரிந்து விட்டது போலவும், இந்த இழப்பில் இருந்து மீண்டு வர முடியாது என்பது போலவும் சித்தரிப்பதில் மும்முரமாக இருந்தன. INDIA கூட்டணி அண்ணல் அம்பேத்கர் கண்ட அரசியல் அமைப்பு அறத்தை காக்கவும், தந்தை பெரியார் கண்ட சமத்துவ உலகத்தை படைக்கவும் மக்களோடு செயல்படுகிறது.
நாட்டிலுள்ள சிறுபான்மையினர், இதர பிற்படுத்தப்பட்ட மக்கள், பட்டியல் சமூகத்தினர், பழங்குடியின மக்கள், பெண்கள், ஏழை எளிய மக்கள் என சாதி, மதம், பாலினம், வர்க்கம் என்ற வேற்றுமைகளால் ஒடுக்கப்படும் மக்களை பாஜக பெரும் துன்பங்களுக்கு உள்ளாக்கும் போதும் கூட ஒருவரால் அக்கட்சியுடன் கைகோர்க்க முடிகிறது என்றால், அவர் பிரிந்தது INDIA கட்டணியின் இலக்குக்கு நன்மையே. இருப்பினும் ஒரு மாநில கட்சி பாஜகவில் இணைவது அம்மாநிலத்தின் உரிமைகளை அடகு வைப்பதற்கு சமம் என்பதால், அம்மாநில மக்களின் நலனை எண்ணி வருந்தாமல் இருக்க முடியவில்லை." என்று குறிப்பிட்டு உள்ளார்.
முன்னதாக அவர் வெளியிட்ட பதிவில், "மீண்டும் ஏலத்தில் பீகார் சட்டமன்றம்! குதிரை பேரத்தில் பாஜகவும், நிதிஷ் குமாரும். ஆனால் வாக்களித்துத் தேர்வு செய்த மக்களை ஏல அரங்கில் காணோம்! பீகாரில் நடக்கும் அரசியல் கூத்தை காணும் போது 'கருத்தியல் ரீதியாக அங்கு மக்கள் அரசியல் படுத்தப்படவில்லை என்ற உண்மை' தெளிவாக தெரிய வந்துள்ளது. தமிழ் நாட்டில் மக்கள் விருப்பதிற்கு எதிராக அரசியல் நிகழ்வுகள் நடைபெறாமல் இருப்பதற்கு முக்கிய காரணம் திராவிட இயக்கங்கள் கருதியல் சார்ந்த அரசியலை தமிழ்நாட்டின் பட்டி தொட்டியெல்லாம் கொண்டு சென்று உள்ளன." என்று குறிப்பிட்டு உள்ளார்.
Click it and Unblock the Notifications
Sign in with Google