"சிறப்பு வகுப்பு கூடாது".. நாளை முதல் 9 நாள் காலாண்டு விடுமுறை.. பள்ளி மாணவர்களுக்கு குட்நியூஸ்

சென்னை: தமிழகத்தில் பள்ளி மாணவ-மாணவிகளுக்கான காலாண்டு தேர்வு இன்றுடன் முடிவடைகிறது. நாளை முதல் அக்டோபர் 5ம் தேதி வரை காலாண்டு தேர்வு விடுமுறை வழங்கப்பட்டுள்ளது. இந்நிலையில் தான், காலாண்டு விடுமுறையில் சிறப்பு வகுப்புகள் நடத்தகூடாது. மீறி சிறப்பு வகுப்புகள் நடத்தினால் கடும் நடவடிக்கை எடுக்கப்படும் என சுற்றறிக்கை வெளியிட்டுள்ளது.

தமிழகத்தில் பிளஸ் 1 மற்றும் பிளஸ் 2 மாணவ-மாணவிகளுக்கு செப்டம்பர் 10ம் தேதி முதல் தேர்வு தொடங்கியது. இந்த தேர்வு இன்றுடன் முடிவடைந்தது.

அதேபோல், பள்ளிகளில் 6 முதல் 9ம் வகுப்பு, 10ம் வகுப்பு வரையிலான மாணவர்களுக்கு செப்டம்பர் 15ம் தேதி காலாண்டு தேர்வு தொடங்கியது. இந்த தேர்வு இன்றுடன் முடிவுக்கு வந்தது. 10, 12ம் வகுப்பு மாணவர்களுக்கான தேர்வுகள் காலையிலும், 11ம் வகுப்பு மாணவர்களுக்கான தேர்வுகள் மதிய வேளையிலும் நடைபெற்றது .

இதையடுத்து, மாணவர்களுக்கு காலாண்டு விடுமுறை நாளை (செப்டம்பர் 27) முதல் அக்டோபர் 5ம் தேதி வரை 9 நாட்கள் வழங்கப்பட்டுள்ளது.
இந்த விடுமுறையில்தான் ஆயுத பூஜை, விஜயதசமி, காந்தி ஜெயந்தி ஆகியவை கொண்டாடப்படுகின்றன. இந்த விடுமுறை முடிந்து பள்ளிகள் மீண்டும் அக்டோபர் 6ம் தேதி திறக்கப்பட உள்ளன. இதற்கிடையே தான் காலாண்டு விடுமுறையில் ஆசிரியர்களை பள்ளிக்கு வரவழைத்து சிறப்பு வகுப்புகள் நடத்த தனியார் பள்ளிகள் கட்டாயப்படுத்துவதாக புகார்கள் வந்துள்ளன.

இதற்கிடையே, காலாண்டு விடுமுறையில் ஆசிரியர்களை பணிக்கு வர வற்புறுத்துவதாக குற்றச்சாட்டு எழுந்துள்ளது. இதுகுறித்து அரசுப் பள்ளி ஆசிரியர்கள் சிலர் கூறியபோது, ''காலாண்டு விடுமுறை நாட்களில் சில குறிப்பிட்ட வகுப்புகளுக்கு சிறப்பு வகுப்பு நடத்த வேண்டும் என மாவட்ட முதன்மைக் கல்வி அலுவலர்கள் அறிவுறுத்தியுள்ளனர். இந்த முடிவை கைவிட்டு காலாண்டு தேர்வு விடுமுறையை முழுமையாக எடுத்துக் கொள்ள பள்ளிக்கல்வித் துறை வழிசெய்ய வேண்டும்'' என்றனர்.

இதுபற்றி பள்ளி கல்வித்துறைக்கும் புகார்கள் சென்றன. இந்நிலையில் தான் தனியார் பள்ளி இயக்குநர் சார்பில், காலாண்டு விடுமுறையில் சிறப்பு வகுப்புகள் நடத்தகூடாது. மீறி சிறப்பு வகுப்புகள் நடத்தினால் கடும் நடவடிக்கை எடுக்கப்படும் என சுற்றறிக்கை வெளியிட்டுள்ளது. அதில், விடுமுறை நாளில் சிறப்பு வகுப்புகளை நடத்த நீதிமன்றம் தடை விதித்து இருப்பது சுட்டிக்காட்டப்பட்டுள்ளது.

English summary

The quarterly exams for school students in Tamil Nadu are ending today. The quarterly exam holiday has been granted from tomorrow to October 5. In this situation, special classes should not be held during the quarterly vacation. A circular has been issued stating that strict action will be taken if special classes are held in violation.