கண்கலங்கிய பிடிஆர்.. "மதுரை மண்ணுடனான ரத்த பந்தம்.." உருக்கமான பேச்சால் நெகிழ்ந்த மக்கள்!
மதுரை: தேர்தல் களம் இறுதிக் கட்டத்தை எட்டியுள்ள நிலையில், கடைசி நாளான இன்று பல்வேறு தலைவர்களும் இறுதிக்கட்ட பிரச்சாரத்தை மேற்கொண்டனர். மதுரையில் நடைபெற்ற பரப்புரை கூட்டத்தில் மதுரை மத்தி திமுக வேட்பாளரும் தமிழக தகவல் தொழில்நுட்பத் துறை அமைச்சர் பி.டி.ஆர். பழனிவேல் தியாகராஜன் உணர்ச்சி வசப்பட்டுக் கண்கலங்கிய சம்பவம் நெகிழ்ச்சியை ஏற்படுத்தியுள்ளது.
மதுரையின் பாரம்பரியமிக்க அரசியல் குடும்பத்தைச் சேர்ந்த பி.டி.ஆர், எப்போதும் தரவுகள் மற்றும் தர்க்க ரீதியாகப் பேசுபவர். ஆனால், இன்றைய கூட்டத்தில் அவர் தனது குடும்பத்திற்கும் மதுரை மண்ணிற்குமான உறவை நினைவுகூர்ந்து பேசத் தொடங்கியபோது குரல் தழுதழுத்தது.
அமைச்சர் பிடிஆர்
இறுதி நாளான இன்று மக்களிடையே பேசிய அவர், "என் தந்தைக்கும், தாத்தாவுக்கும் இந்த மதுரை மக்கள் கொடுத்த அன்பிற்கு நான் எப்போதும் கடமைப்பட்டிருக்கிறேன்" என்று அவர் கூறினார்.
கடந்த சில காலங்களாகத் தன் மீது வைக்கப்பட்ட விமர்சனங்கள் மற்றும் அரசியல் ரீதியான சவால்கள் குறித்துப் பேசுகையில், "பதவிக்காக நான் அரசியலுக்கு வரவில்லை. சேவை செய்யவும், என் குடும்பத்தின் நற்பெயரைக் காக்கவும் மட்டுமே உழைக்கிறேன். சில நேரங்களில் தனிப்பட்ட தாக்குதல்கள் வலியைத் தந்தாலும், மக்களின் ஆதரவுதான் என்னை நிமிர வைக்கிறது" என்று கூறி கண் கலங்கினார்.
கலங்கிய பிடிஆர்
அவர் மேலும் பேசுகையில், "இங்கு நான் நிற்கும்போது, என் முன்னால் அமர்ந்திருக்கும் உங்களைப் பார்க்கவில்லை; எனக்குப் பின்னால் இருக்கும் என் முன்னோர்களின் நிழலைப் பார்க்கிறேன். மதுரைக்கும் என் குடும்பத்திற்குமான உறவு என்பது வெறும் ஓட்டு வங்கி அரசியல் அல்ல. அது தலைமுறை தலைமுறையாக ரத்தமும் சதையுமாகப் பிணைக்கப்பட்டது. என் தாத்தாவும் தந்தையும் இந்த மண்ணிற்காக எதைச் செய்தார்களோ, அதில் ஒரு துளியாவது நான் செய்துவிட வேண்டும் என்ற தவிப்புதான் ஒவ்வொரு நாளும் என்னை ஓட வைக்கிறது" என்றார்.
தனிப்பட்ட விமர்சனம்
தொடர்ந்து தனது அரசியல் பயணத்தில் சந்தித்த சவால்கள் குறித்துப் பேசுகையில், "நான் ஒரு கார்ப்பரேட் ஆள் என்றும், மேட்டிமைத்தனமானவன் என்றும் பலர் முத்திரை குத்தினார்கள். ஆனால், என் உள்ளம் இந்த மதுரை மண்ணிற்காகத்தான் துடிக்கிறது என்பது எனக்குத் தெரியும். அரசியலில் தூய்மையையும், வெளிப்படைத்தன்மையையும் கொண்டு வர நினைத்தபோது பல முட்டுக்கட்டைகள் வந்தன. தனிப்பட்ட ரீதியில் நான் தாக்கப்பட்டபோது கூட கலங்காத என் மனம், மக்களின் எதிர்பார்ப்பை என்னால் முழுமையாக நிறைவேற்ற முடியவில்லையோ என்ற அச்சம் வரும்போது மட்டும் உடைந்து போகிறது.
மதுரைக்காக
நிதியமைச்சராக இருந்தபோதும் சரி, இப்போது தகவல் தொழில்நுட்பத் துறை அமைச்சராக இருக்கும்போதும் சரி, நான் போடும் ஒவ்வொரு கையெழுத்திலும் 'என் மதுரைக்கு இதனால் என்ன லாபம்?' என்றுதான் முதலில் யோசிப்பேன். நான் படித்த வெளிநாட்டுப் படிப்பும், நான் பார்த்த உலகமும் இந்த எளிய மக்களின் வாழ்வை உயர்த்தப் பயன்படாவிட்டால் அதற்குப் பொருளே இல்லை. நான் இழந்தது அதிகம், ஆனால் இந்த மண்ணிற்காக நான் செய்ய வேண்டிய கடமை இன்னும் பாக்கி இருக்கிறது.
தேர்தல் வரும், போகும். ஆனால் தர்மம் நிலைக்க வேண்டும். நீங்கள் போடும் ஒரு ஓட்டு என்பது வெறும் அதிகாரம் அல்ல, அது ஒரு நேர்மையான நிர்வாகத்திற்கான அங்கீகாரம். என் மீது நீங்கள் வைத்திருக்கும் நம்பிக்கையை ஒருபோதும் சிதைக்க மாட்டேன்" என்றார். எப்போதும் நிதானமாகப் பேசும் ஒரு தலைவர், கடைசிக்கட்ட பிரச்சாரத்தில் இதுபோல பேசியது மதுரை மக்களைக் கலங்க வைத்தது.
Click it and Unblock the Notifications
Sign in with Google