வெளியேறிய எடப்பாடி பழனிசாமி.. பேட்ஜை கழற்றிவிட்டு சட்டசபையில் பேசிய செங்கோட்டையன்! பனிப்போர் உச்சம்?

சென்னை: எடப்பாடி பழனிசாமி உள்ளிட்ட அதிமுக எம்.எல்.ஏக்கள் இன்று சட்டப்பேரவையில் இருந்து வெளிநடப்பு செய்த நிலையில், அதிமுக முன்னாள் அமைச்சரான செங்கோட்டையன் வெளியேறாமல் சட்டசபைக்குள் அமர்ந்திருந்தார். இதன் மூலம் எடப்பாடி பழனிசாமி - செங்கோட்டையன் இடையேயான மோதல் தொடர்ந்து வருவது வெட்ட வெளிச்சமாகியுள்ளது.

சட்டசபையில் டாஸ்மாக் விவகாரம் குறித்து பேச வேண்டும் என அதிமுக பொதுச் செயலாளர் எடப்பாடி பழனிசாமி கோரிக்கை விடுத்தார். அதற்கு சபாநாயகர் அப்பாவு அனுமதி மறுத்தார். "டாஸ்மாக் விவகாரம் தொடர்பாக நீதிமன்றத்தில் வழக்கு உள்ளதால் அதை பற்றி விவாதிக்க முடியாது. ஸ்டெர்லைட் விவகாரம் குறித்து அதிமுக ஆட்சியில் எதிர்க்கட்சி கேள்வி எழுப்பியபோது பேச அனுமதிக்கவில்லை" எனக் கூறினார்.

இதையடுத்து, சட்டசபை கூட்டம் நடக்கும்போது, முதல்வர் ஸ்டாலின் பதவி விலக வலியுறுத்தும் பதாகையை காட்டியதால், அவையில் இருந்து 13 அதிமுக எம்.எல்.ஏக்கள் வெளியேற்றப்பட்டனர். அக்ரி கிருஷ்ணமூர்த்தி, இசக்கி சுப்பையா உள்ளிட்ட 13 அதிமுக உறுப்பினர்கள் பதாகைகளை தூக்கிக் காட்டினர். அவர்கள் இன்று ஒரு நாள் சஸ்பெண்ட் செய்யப்பட்டதாக சபாநாயகர் அறிவித்தார்.

மேலும், மற்றவர்கள் சட்டையில் அணிந்திருக்கும் பேட்ஜ்ஜை கழற்றிவிட்டு வந்தால் அனுமதிக்கப்படுவார்கள் எனத் தெரிவித்தார். அதனைத் தொடர்ந்து, எடப்பாடி பழனிசாமி உள்பட அதிமுக உறுப்பினர்கள் அனைவரும் வெளிநடப்பு செய்தனர். ஓபிஎஸ் ஆதரவு எம்.எல்.ஏக்கள் அவைக்குள் இருந்தனர்.

அதேசமயம், அதிமுக மூத்த தலைவரான செங்கோட்டையன் அவைக்குள்ளே இருந்தார். வெளிநடப்பு செய்தபோது, அதிமுகவினருடன் சேர்ந்து சென்ற ஒருசில நொடிகளில் செங்கோட்டையன் மீண்டும் அவைக்குள் திரும்பினார். தனது தொகுதியில் உள்ள சாயக்கழிவு பிரச்சனை தொடர்பான கவன ஈர்ப்பு தீர்மானத்தில் கலந்து கொண்டு பேசினார்.

மேலும், சட்டையில் அணிந்திருந்த "அந்த தியாகி யார்?” பேட்ஜை அகற்ற சபாநாயகர் உத்தரவிட்டதால், பேட்ஜை கழற்றி வைத்துவிட்டு செங்கோட்டையன் பேசினார். ஏற்கனவே செங்கோட்டையன் - எடப்பாடி பழனிசாமி இடையே பனிப்போர் நிலவுவதாக கூறப்படும் நிலையில் இன்று எடப்பாடி பழனிசாமி உள்ளிட்ட அதிமுக எம்.எல்.ஏக்கள் வெளியேறிய நிலையிலும், அவர் சட்டசபை விவாதத்தில் பங்கேற்றதன் மூலம் மோதல் பொக்கு வெட்ட வெளிச்சம் ஆகியுள்ளது.

English summary

While AIADMK MLAs including Edappadi Palaniswami walked out of the Assembly today, former AIADMK minister Sengottaiyan remained seated inside the Assembly without leaving. This has brought to light the ongoing conflict between Edappadi Palaniswami and Sengottaiyan.