தமிழக காங்கிரஸில் அந்த "மூன்று 420" தலைவர்கள்... வீடியோ ஆதாரத்துடன் கடுப்படித்த ராகுல் காந்தி!

Updated: Sunday, September 26, 2021, 11:56 [IST]

Subscribe to Oneindia Tamil

சென்னை: தமிழக காங்கிரஸ் கமிட்டியில் மூன்று 420 தலைவர்கள் இருக்கிறார்கள் என ஒரு வீடியோ ஆதாரத்துடன் தம்மை சந்தித்தவர்களிடம் காங்கிரஸ் கட்சியின் மூத்த தலைவர் ராகுல் காந்தி காட்டமாக விமர்சித்தார் என்பதுதான் இப்போது பரபரப்பாக பேசப்படுகிறதாம்.

தமிழக காங்கிரஸ் கமிட்டித் தலைவரான கே.எஸ்.அழகிரியை மாற்றியே தீருவது என்பதில் மேலிடம் உறுதியாக இருக்கிறது. இதனால்தான் எப்படியாவது காங்கிரஸ் கமிட்டித் தலைவர் பதவியை வாங்கிவிட வேண்டும் என சீனியர்கள் முட்டி மோதுகின்றனர்.

அதுவும் தமிழக காங்கிரஸ் எம்.பி.க்கள் அத்தனை பேரும் படுதீவிரமாக உள்ளனர். இதற்காக டெல்லியிலேயே முகாமிட்டு எத்தனை வழிகள் இருக்கிறதோ அத்தனை வழிகளையும் கையில் எடுத்திருக்கின்றனர்.

காங். செயல் தலைவர்கள்

இதனிடையே தமிழக காங்கிரஸ் கமிட்டித் தலைவர் மாற்றத்தின் போது கையோடு புதிய செயல் தலைவர்களையும் நியமிப்பது என்பதிலும் காங்கிரஸ் மேலிடம் உறுதியாக உள்ளது. புதிய செயல் தலைவர்கள் யார் என்பதில்தான் சற்று குழப்பம் தொடருகிறதாம். அதனால் தலைவர் பதவி மாற்றம் உடனே நடக்கவில்லை எனவும் கூறப்படுகிறது.

டெல்லிக்கு வீடியோ புகார்கள்

மேலும் செயல் தலைவர் பதவியை முன்வைத்து நடக்கும் அத்தனை பேரங்களும் வீடியோ ஆதாரங்களுடன் டெல்லிக்கு அடுத்தடுத்து அனுப்பி வைக்கப்பட்டிருக்கிறதாம். இதனால் டெல்லி மேலிடம் தமிழக காங்கிரஸ் தலைவர்கள் மீது கடும் கோபத்திலும் அதிருப்தியிலும் இருக்கிறதாம். அண்மையில் தமிழக காங்கிரஸ் எம்.பி. ஒருவர் ராகுல் காந்தியை சந்தித்து கட்சி நிலவரம் குறித்து சில விஷயங்களைப் பேசியிருக்கிறார்.

ராகுல் காட்டிய வீடியோ

அப்போது ராகுல் காந்தி, நீங்கள் சொல்ற தகவல்கள் அதிர்ச்சியாகத்தான் இருக்கிறது.. ஆனால் இந்த வீடியோக்களைப் பாருங்க.. கட்சி பதவிக்காக இப்படியா செய்வாங்க? தமிழக அரசியலைவிட தமிழக காங்கிரஸில் நடக்கும் அரசியல்தான் வொர்ஸ்ட்டாக இருக்கிறது என்றதுடன் அந்த வீடியோக்களையும் போட்டு காட்டியிருக்கிறார். அதில் பண பரிமாற்றங்கள், தேர்தலை முன்வைத்து நடந்த பண ஆதாயங்கள் ஆகியவை அசைக்க முடியாத ஆணித்தரமாக ஆதாரமாக இருந்தனவாம்.

அந்த 420 தலைவர்கள்

மேலும், இப்படி எல்லாம் செய்தால் காங்கிரஸ் கட்சி எப்படிதான் வளரும்? காங்கிரஸ் கட்சியை வைத்து வியாபாரம் செய்கிறார்களா? தமிழக காங்கிரஸ் கமிட்டியில் மூன்று 420 தலைவர்கள் இருக்கிறார்கள்...எனவும் ஆவேசப்பட்டிருக்கிறார் ராகுல் காந்தி. இது தொடர்பாக நம்மிடம் தகவலைப் பகிர்ந்து கொண்ட அந்த எம்.பி.யிடம் யார் அந்த மூன்று 420 தலைவர்கள் என கேட்ட போது, உயரத்தில் இருப்பவர்; அவருக்கு பொறுப்பாளர்; அந்த பொறுப்பாளரை கண்காணிப்பவர் என மேல்மட்டங்களை கோடிட்டு காட்டினார். இப்போது காங்கிரஸ் வட்டாரங்களில் ராகுல் காந்தியின் இந்த 420 கமெண்ட்தான் பரபரப்பாகவும்ன் பேசப்படுகிறது.