4% வாக்குதான்.. உங்களுக்கு இருக்கு! காங்கிரசுக்கு கணக்கு காட்டிய திமுக.. கிளைமேக்ஸை நெருங்கும் மோதல்

சென்னை: தமிழக அரசியலில் திமுக, இந்திய தேசிய காங்கிரஸும் நீண்டகாலமாக ஒரு வலுவான கூட்டணியைப் பேணி வருகின்றன. ஆனால், சமீபகாலமாக தொகுதிப் பங்கீடு மற்றும் வாக்கு வங்கி தொடர்பான விவாதங்கள் இந்தக் கூட்டணியின் எதிர்காலக் கேள்விக்குறிகளை எழுப்பியுள்ளன. கூட்டணி கிட்டத்தட்ட உடையும் நிலையில் உள்ளது.

இப்படிப்பட்ட நிலையில்தான் திமுக கூட்டணியில் இருந்து வெளியேறி போட்டியிடும் அளவிற்கு காங்கிரசுக்கு பலம் இருக்கிறதா என்ற கேள்வி எழுந்துள்ளது. குறிப்பாக, 1980-களில் இருந்த காங்கிரஸின் செல்வாக்கிற்கும், இன்றைய நிலையை ஒப்பிடும்போது மலைக்கும் மடுவுக்கும் உள்ள வித்தியாசம் பளிச்சிடுகிறது. காங்கிரசின் வாக்கு வங்கியை வெளியிட்டு திமுகவினர் அவர்களுக்கு பிரஷர் போட்டு வருகின்றனர்.

1980-ல் காங்கிரசின் பலம்

தமிழக அரசியல் வரலாற்றில் 1980-ம் ஆண்டு ஒரு முக்கியமான மைல்கல். அப்போது நடைபெற்ற சட்டமன்றத் தேர்தலில் திமுகவும் காங்கிரஸும் சம எண்ணிக்கையிலான தொகுதிகளில் போட்டியிட்டன. அந்தச் சமயத்தில் காங்கிரஸ் மத்தியில் ஆளும் கட்சியாகவும், தமிழகத்தில் அசைக்க முடியாத சக்தியாகவும் இருந்தது. இதற்கு வலுவான சான்றாக 1977 சட்டமன்றத் தேர்தலைக் குறிப்பிடலாம். அப்போது தனித்துப் போட்டியிட்ட காங்கிரஸ் கட்சி 20.8% வாக்குகளைப் பெற்று தனது பலத்தை நிரூபித்திருந்தது.

தொடர் சரிவும் பிளவுகளும்

ஆனால், இந்த எழுச்சி நீண்டகாலம் நீடிக்கவில்லை. தமிழகத்தில் காங்கிரஸ் கடைசியாக 2014-ல் தனித்துப் போட்டியிட்டது. அப்போது அந்தக் கட்சி பெற்ற வாக்குகள் வெறும் 4.3% மட்டுமே. இந்தத் தோல்விக்குப் பிறகு கட்சியில் ஏற்பட்ட பெரும் பிளவுகள் அதன் அடிமட்டக் கட்டமைப்பை மேலும் பலவீனப்படுத்தின.

தமிழகத்தில் மட்டுமல்லாது, அண்டை மாநிலமான ஆந்திரப் பிரதேசத்திலும் காங்கிரஸின் நிலை கவலைக்கிடமாகவே உள்ளது. கடந்த ஆந்திர சட்டமன்றத் தேர்தலில் காங்கிரஸின் வாக்குச் சதவீதம் வெறும் 1.72% ஆகச் சுருங்கியது. தமிழகத்தில் இந்த நிலை இன்னும் மோசமாக இருப்பதாகப் புள்ளிவிவரங்கள் தெரிவிக்கின்றன.

வாக்கு வங்கியின் எதார்த்த நிலை

காங்கிரஸின் ஒட்டுமொத்த வாக்குச் சதவீதத்தை உற்றுநோக்கும்போது, ஒரு அதிர்ச்சிகரமான உண்மை வெளிப்படுகிறது. தமிழகத்தில் காங்கிரஸின் கோட்டையாகக் கருதப்படும் கன்னியாகுமரி மாவட்டத்தின் வாக்குகளைத் தவிர்த்துவிட்டுப் பார்த்தால், தமிழகத்தின் பிற பகுதிகளில் அக்கட்சியின் வாக்கு வங்கி வெறும் ஒரு சதவீதம் மட்டுமே என்பது அரசியல் விமர்சகர்களின் கருத்தாக உள்ளது.

திமுகவிற்கு காங்கிரஸ் தேவையா?

தற்போதைய அரசியல் சூழலில், திமுக ஒரு மிகப்பெரிய சக்தியாக உருவெடுத்துள்ளது. எனவே, "திமுகவிற்கு காங்கிரஸின் கூட்டணி உண்மையில் தேவையா? அல்லது காங்கிரசுக்குத்தான் திமுக தேவையா? என்ற கேள்வி எழுந்துள்ளது. பாஜகவை எதிர்க்கும் தேசிய முகம் தேவை என்பதற்காக காங்கிரஸைக் கூட்டணியில் சேர்த்துக் கொண்டாலும், தொகுதிப் பங்கீட்டில் திமுக கடுமையான நிலைப்பாட்டை எடுக்கக்கூடும்.

கூடுதல் இடங்கள்: காங்கிரஸிற்கு ஒதுக்கப்படும் இடங்களை திமுகவே நேரடியாகப் போட்டியிட்டால், குறைந்தபட்சம் ஆறு கூடுதல் சட்டமன்றத் தொகுதிகளில் திமுக எளிதாக வெற்றி பெற முடியும் எனக் கணிக்கப்படுகிறது.

தேசிய அரசியல் கட்டாயம்: இருப்பினும், தேசிய அளவில் 'இந்தியா' (INDIA) கூட்டணியின் ஒரு அங்கமாக இருப்பதாலேயே திமுக இந்தக் கூட்டணியைத் தொடர்ந்து வருகிறது.

ஒரு காலத்தில் சம பலத்துடன் கைகோர்த்த இந்தக் கூட்டணி, இன்று ஒரு தரப்பின் பலத்திலும் மற்றொரு தரப்பின் பெயரளவிலான செல்வாக்கிலும் இயங்கிக் கொண்டிருக்கிறது என்பது மறுக்க முடியாத உண்மை.

English summary

The DMK-Congress Alliance: What is the actual power of Rahul Gandhi in Tamil Nadu