"அதிகார அரசியல்.. ஆட்சி பீடம் நோக்கி செல்வோம்.." காலையிலேயே விஜய்யிடம் இருந்து வந்த ட்வீட்.!

Updated: Monday, February 2, 2026, 14:15 [IST]

Subscribe to Oneindia Tamil

சென்னை: தவெக ஆரம்பித்து இன்றுடன் 3 ஆண்டுகள் ஆகும் நிலையில், தவெக தலைவர் விஜய் இது தொடர்பாக ட்விட்டரில் அறிக்கை ஒன்றை வெளியிட்டுள்ளார். 2026 தவெக வருகையால் புதிய சூழல் உருவாகி இருப்பதாகவும் தேர்தல் அரசியல் வெற்றி மூலம் அதிகார அரசியல் அங்கீகாரம் நோக்கிச் செல்வோம் என்றும் அவர் பதிவிட்டுள்ளார்.

நடிகர் விஜய் கடந்த 3 ஆண்டுகளுக்கு முன்பு தமிழக வெற்றிக் கழகம் என்ற கட்சியை ஆரம்பித்தார். இன்றுடன் தவெக ஆரம்பித்து 3 ஆண்டுகள் ஆகிறது. இதற்கிடையே இது தொடர்பாக நடிகர் விஜய் ட்வீட் செய்துள்ளார். அதில் அவர் அனைத்து மக்களின் அமோக ஆதரவுடன், தீர்க்கமுடன் ஒற்றுமையாகக் களமாடி, ஆட்சி பீடத்தைக் கைக்கொள்ளும் ஜனநாயக இலக்கை உறுதியாக வெல்வோம் என்று பதிவிட்டுள்ளார்.

இது தொடர்பாக அக்கட்சித் தலைவர் விஜய் தனது ட்விட்டரில், "என் நெஞ்சில் குடியிருக்கும் தோழர்களுக்கு, வணக்கம். நம் உயிரனைய இயக்கமான தமிழக வெற்றிக் கழகத்தின் மகிழ்ச்சிகரமான மூன்றாம் ஆண்டு, இன்று தொடங்குகிறது. இரண்டு ஆண்டுகளை இயல்பாகவும், இயல்பு தாண்டியும் நிறைவு செய்து, நீள்கிறது நம் அரசியல் பெரும்பயணம்.

முதன்மை அரசியல் சக்தியாகப் பரிணமிக்கும் முன்பே மக்கள் இயக்கமாக, மக்களோடு மக்களாகக் கலந்து நின்றவர்கள் நாம். இதை நாடறியும். நல்லவர்கள் அறிவார்கள். ஒன்றை மட்டும் உறுதியாகச் சொல்லலாம். சலனங்களைப் புறந்தள்ளி, சமநிலை தவறாத, அளக்கவியலாத ஆழ்கடல் த.வெ.க.; எவராலும் விலக்க இயலாத விரிவானம் த.வெ.க.; அத்தனை இலக்குகளையும் அர்ப்பணிப்புடன் வெல்லும், சாமானிய மக்களுக்கான அதிகார அரசியலின் வெற்றிப் போர்முரசம் த.வெ.க.!

2026 சட்டமன்றத் தேர்தல் களம், இதுவரை இல்லாத புதிய சூழலைச் சுமந்து நிற்கிறது. இதற்கு ஒரே காரணம் நமது அரசியல் வருகை மட்டுமே என எல்லோரும் சொல்கின்றனர். எனவே இச்சூழலில், களத்தை நமதாக்கி, தேர்ந்த தெளிவுடனும் திறன்மிக்க நுட்பத்துடனும் தேர்தல் அரசியல் வெற்றியின் வாயிலாக, அதிகார அரசியல் அங்கீகாரம் நோக்கிச் செல்வோம். அனைத்து மக்களின் அமோக ஆதரவுடன், தீர்க்கமுடன் ஒற்றுமையாகக் களமாடி, ஆட்சி பீடத்தைக் கைக்கொள்ளும் ஜனநாயக இலக்கை உறுதியாக வெல்வோம்" என்று அவர் பதிவிட்டுள்ளார்.