சங்கீதா மேல அவ்வளவு பாசம்.. மனைவியை விட்டுத் தராத விஜய்! மாநாட்டு தேதியில் இப்படி ஒரு சர்ப்ரைஸ்!

Updated: Wednesday, July 16, 2025, 12:34 [IST]

Subscribe to Oneindia Tamil

சென்னை: பெரும் எதிர்பார்ப்புகளுக்கு இடையே தமிழக வெற்றிக் கழகத்தின் இரண்டாவது மாநில மாநாடு மதுரையில் வரும் ஆகஸ்ட் 25ஆம் தேதி நடைபெறும் என அறிவித்திருக்கிறார் நடிகர் தமிழக வெற்றிக் கழகத்தின் தலைவரான விஜய். இந்த நிலையில் மாநாட்டு தேதியில் ஒரு சுவாரசிய விஷயம் இருக்கிறது. வேறொன்றுமில்லை. அன்று தான் விஜய் தனது திருமண நாளை கொண்டாடுகிறார் என்பது கூடுதல் தகவல்.

தமிழ் சினிமாவில் குழந்தை நட்சத்திரமாக அறிமுகமாகி நாயகனாக உயர்ந்து தற்போது அரசியல்வாதி அவதாரம் எடுத்திருக்கிறார் விஜய். 2026 சட்டமன்ற தேர்தல் தான் இலக்கு எனக் கூறி கடந்த ஆண்டு பிப்ரவரி மாதம் தமிழக வெற்றிக் கழகத்தை தொடங்கினார்.

தொடர்ந்து அக்டோபரில் விழுப்புரம் மாவட்டம் விக்கிரவாண்டி வி சாலை பகுதியில் கட்சியின் முதல் மாநில மாநாடு மிக பிரம்மாண்டமாக நடைபெற்றது. கட்சி ஆரம்பித்தாலும் அறிக்கை அரசியல் தான் செய்கிறார், ஒர்க் ப்ரம் ஹோம் அரசியல்வாதி என விஜய் மீது விமர்சனங்கள் எழுந்தது.

அதனை தவிடு பொடியாக்கும் வகையில் பல்வேறு விவகாரங்களை நேரடியாகவே தலையிட்டார். பரந்தூர் விமான நிலைய போராட்ட எதிர்ப்பு குழுவினரை சந்தித்தது, சிவகங்கை காவல் மரணத்தில் பாதிக்கப்பட்ட அஜித்குமாரின் குடும்பத்தினரை நேரில் சந்தித்தது, அடுத்ததாக சென்னையில் காவல் நிலைய மரணங்களை கண்டித்து ஆர்ப்பாட்டம் என விஜய் தீவிர அரசியலுக்கு திரும்பி இருக்கிறார். 2026 ஆம் ஆண்டு தேர்தலுக்கு இன்னும் பத்து மாதங்களே இருக்கும் நிலையில் தமிழ்நாடு முழுவதும் சுற்று பயணத்தை மேற்கொள்ள இருக்கிறார் விஜய்.

இந்த நிலையில் தமிழக வெற்றிக் கழகத்தின் தொண்டர்களுக்கு இன்ப அதிர்ச்சி தரும் வகையில் விஜயின் தமிழக வெற்றிக் கழகத்தின் இரண்டாவது மாநில மாநாடு குறித்த அறிவிப்பு வெளியாகி இருக்கிறது. வரும் ஆகஸ்ட் மாதம் 25ஆம் தேதி தமிழக வெற்றி கழகத்தின் இரண்டாவது அரசியல் மாநில மாநாடு நடைபெறும் என அதிகாரப்பூர்வமாக அறிவித்திருக்கிறார் விஜய். இதற்கு முன்னர் மாநாடு குறித்த பல்வேறு யூகங்கள் எழுந்த நிலையில் இந்த மாநில மாநாடு குறித்து அறிவிப்பு திடீரென வெளியிடப்பட்டிருக்கிறது.

முன்னதாக இன்று காலை மாநாட்டுக்கான பூமி பூஜையும் நடைபெற்றது. அதில் கலந்து கொண்டவர்களே மினி மாநில மாநாடு போல கூட்டத்தை திரட்டியது குறிப்பிடத்தக்கது. இது ஒரு புறம் இருக்க தற்போது விஜய் ரசிகர்கள் மாநாட்டு தேதியில் ஒரு சுவாரசியத்தை கண்டுபிடித்திருக்கின்றனர். அது வேறு ஒன்றும் அல்ல அன்றுதான் விஜய் தனது 26வது திருமண நாளை கொண்டாடுகிறார்.

ஆகஸ்ட் 25ஆம் தேதி 1999 ஆம் ஆண்டில் தான் விஜய் தனது ரசிகையான லண்டனைச் சேர்ந்த சங்கீதாவை திருமணம் செய்து கொண்டார். அந்த ஜோடிக்கு சஞ்சய், திவ்யா என இரு குழந்தைகள் இருக்கும் நிலையில் சஞ்சய் வளர்ந்து தற்போது இயக்குனர் அவதாரம் எடுத்துவிட்டார். திவ்யா மேல்படிப்பு படித்து வருகிறார். கடந்த சில தினங்களாகவே விஜய் சங்கீதா தம்பதி குறித்து பல்வேறு வதந்திகள் சமூக வலைதளங்களில் உலாவி வரும் நிலையில், தனது இரண்டு கட்சியின் இரண்டாவது மாநில மாநாட்டை தனது திருமண நாளிலேயே அறிவித்திருக்கிறார் விஜய். இதன் மூலம் தனது குடும்ப வாழ்வு குறித்த விமர்சனங்களுக்கு அவர் முற்றுப்புள்ளி வைத்திருக்கிறார் என்றும் கூறுகின்றனர்.