திரையில் மீண்டும் கர்ஜிக்கும் விஜயகாந்த்! 'கேப்டன் பிரபாகரன்' 4K-வில் ரிலீஸ்
சென்னை: மறைந்த நடிகர் மற்றும் அரசியல் தலைவர் விஜயகாந்தின் திரைப்படப் பயணத்தில் ஒரு மைல்கல்லாக அமைந்த 'கேப்டன் பிரபாகரன்' திரைப்படம், 34 ஆண்டுகளுக்குப் பிறகு மீண்டும் திரைக்கு வரத் தயாராகியுள்ளது. இத்திரைப்படம், விஜயகாந்தின் பிறந்தநாளான 2025 ஆகஸ்ட் 22, அன்று (Captain Prabhakaran re release date), நவீன தொழில்நுட்பங்களுடன் மறுவெளியீடு செய்யப்பட உள்ளது. ஸ்பாரோ சினிமாஸ் (Sparrow Cinemas) மற்றும் முருகன் ஃபிலிம் பேக்டரி ஆகியவை இணைந்து இந்தப் படத்தை தமிழகம் முழுவதும் 500-க்கும் மேற்பட்ட திரையரங்குகளில் வெளியிட உள்ளன.
படத்தின் முக்கியத்துவம்
1991-ல் ஆர்.கே. செல்வமணி இயக்கத்தில் வெளியான இப்படம், விஜயகாந்தின் 100-வது திரைப்படம் என்ற பெருமையைப் பெற்றது. அக்காலத்தில் அதிக பொருட்செலவில் எடுக்கப்பட்டு, திரையரங்குகளில் 300 நாட்களுக்கு மேல் ஓடி மிகப்பெரிய வெற்றி பெற்றது. இந்தப் படத்தின் வெற்றிதான் விஜயகாந்திற்கு 'கேப்டன்' என்ற பட்டப்பெயரை மக்கள் மத்தியில் நிலைநிறுத்தியது. படத்தின் வெற்றியை நினைவுகூரும் வகையில், அவர் தனது மூத்த மகனுக்கு 'விஜய பிரபாகரன்' என்று பெயர் சூட்டினார்.
தொழில்நுட்ப மெருகேற்றம்
இந்த மறுவெளியீட்டிற்காக, படம் முழுமையாக டிஜிட்டல் மயமாக்கப்பட்டுள்ளது. ரசிகர்களுக்கு ஒரு புதிய அனுபவத்தைத் தரும் வகையில், 4K ரெசல்யூசன் மற்றும் 7.1 சரவுண்ட் சவுண்ட் தொழில்நுட்பத்தில் ரீமாஸ்டர் செய்யப்பட்டுள்ளது. ஃபிலிம் விஷன் நிறுவனத்தைச் சேர்ந்த ராமு இந்த ரீமாஸ்டரிங் பணிகளை மேற்கொண்டுள்ளார்.
திரைவாழ்வின் திருப்புமுனை
'கேப்டன் பிரபாகரன்' திரைப்படம் விஜயகாந்திற்கு மட்டுமல்லாமல், அதில் நடித்த பல கலைஞர்களின் திரைவாழ்விலும் ஒரு முக்கிய திருப்புமுனையாக அமைந்தது:
- சரத்குமார்: அதுவரை வில்லன் வேடங்களில் நடித்து வந்த சரத்குமார், இப்படத்தில் நண்பன் கதாபாத்திரத்தில் நடித்த பிறகு கதாநாயகனாக உயர்ந்தார்.
- மன்சூர் அலிகான்: பயங்கரமான வனக் கொள்ளையனாக 'வீரபத்திரன்' கதாபாத்திரத்தில் நடித்த மன்சூர் அலிகான், இப்படத்திற்குப் பிறகு தமிழ் சினிமாவின் பிரபலமான மற்றும் விரும்பப்படும் வில்லனாக ஆனார்.
- இளையராஜா மற்றும் லியாகத் அலி கான்: இளையராஜாவின் இசையில் 'ஆட்டமா தேரோட்டமா' போன்ற பாடல்கள் மாபெரும் வெற்றி பெற்றன. மேலும், லியாகத் அலி கானின் அனல் பறக்கும் வசனங்கள் மக்களிடையே பெரும் வரவேற்பைப் பெற்றன. இந்த வசனங்களுக்காகவே தனி ஆடியோ கேசட்டுகள் வெளியிடப்பட்டு சாதனை படைத்தன.
34 ஆண்டுகளுக்குப் பிறகும், 'கேப்டன் பிரபாகரன்' படத்தின் மீதான எதிர்பார்ப்பு ரசிகர்களிடையே குறையவில்லை. புதிய தொழில்நுட்ப மெருகூட்டலுடன் வெளிவரும் இப்படம், ரசிகர்களுக்கு இனிய நினைவுகளைத் தருவதோடு, இன்றைய தலைமுறை ரசிகர்களையும் கவரும் என எதிர்பார்க்கப்படுகிறது. ஏனெனில் இப்போதுள்ள படங்களின் தொழில்நுட்பத்திற்கு எந்த வகையிலும் குறைந்தது இல்லை கேப்டன் பிரபாகரன்.
Click it and Unblock the Notifications
Sign in with Google