இன்றும் வெயிலுக்கு லீவ்.. நாள் முழுக்க மழை பெய்ய வாய்ப்பு.. சென்னை வானிலை மையம் குட் நியூஸ்!

சென்னை: தமிழகத்தில் இன்று கனமழை பெய்ய வாய்ப்புள்ளது என்று வானிலை ஆய்வு மையம் தெரிவித்து இருக்கிறது. நேற்று இரவு முழுக்க பல்வேறு இடங்களில் பரவலாக மழை பெய்தது.

தமிழகத்தில் தற்போது கோடை மழை பெய்து வருகிறது. ஃபானி புயல் ஏமாற்றினாலும், வெப்பச்சலனம் காரணமாக மழை பெய்து வருகிறது.

அக்னி வெயில் நிலவி வரும் வேளையில் தமிழகத்தில் பல்வேறு மாவட்டங்களில் நேற்று இரவு முழுக்க மழை பெய்தது. இந்த நிலையில் இன்றும் தமிழகத்தில் மழை பெய்யும் என்று வானிலை ஆய்வு மையம் தெரிவித்து இருக்கிறது.

நேற்று விழுப்புரம் மாவட்டத்தில் கனமழை பெய்தது. அங்கு திருக்கோவிலூரில் அதிகபட்சமாக 9 செ.மீ. மழை பதிவாகி இருக்கிறது. இன்றும் அங்கு மழை பெய்ய வாய்ப்புள்ளதாக வானிலை ஆய்வு மையம் தெரிவித்துள்ளது.

திருவாரூர், நாகை, கடலூர் மாவட்டங்களின் பல்வேறு பகுதிகளில் மழை பெய்யும் என்று வானிலை ஆய்வு மையம் கூறியுள்ளது. அதேபோல் சென்னையில் இன்று மாலைக்கு மேல் மழை பெய்யலாம். சமயங்களில் குளிரான காற்று வீச வாய்ப்புள்ளது.

கொடைக்கானல், மதுரை, காஞ்சிபுரம், ஸ்ரீவில்லிபுத்தூர், சத்தியமங்கலம் பகுதிகளில் இன்று கனமழைக்கு வாய்ப்புள்ளது. பல இடங்களில் இடியுடன் கூடிய கனமழை பெய்ய வாய்ப்புள்ளது. புதிய புயல் சின்னம் உருவாகும் பட்சத்தில் தமிழகத்தில் நல்ல மழை பெய்யும் என்று வானிலை மையம் தெரிவித்துள்ளது.

English summary

Weather Report: Heavy rain expected to hit in many inner regions of Tamilnadu today.