அதிமுக பொதுச் செயலாளரானதும் புதிய பிரச்சார வாகனத்திற்கு மாறினார் எடப்பாடி பழனிசாமி.. என்ன ஸ்பெஷல்?
சென்னை: எடப்பாடி பழனிசாமி புதிய பிரச்சார வாகனத்தில் சேலத்தில் நடந்த பொதுக் கூட்டத்திற்கு வந்தது தொண்டர்களின் கவனத்தை ஈர்த்தது.
அதிமுகவில் ஒற்றைத் தலைமை பிரச்சினை காரணமாக அதிமுக பிரிந்து கிடக்கிறது. அதிமுகவின் பொதுச் செயலாளர் பதவியா கைப்பற்ற எடப்பாடிக்கு 98 சதவீத பொதுக் குழு உறுப்பினர்கள் ஆதரவு தந்தனர்.
இதையடுத்து பொதுக் குழுவில் தீர்மானம் நிறைவேற்றப்பட்டது. இடைக்கால பொதுச் செயலாளராக தேர்வு செய்யப்பட்டு பொதுச் செயலாளர் தேர்தலில் ஒரு மனதாக தேர்வு செய்யப்பட்டார். இந்த நிலையில் தாம்தான் அதிமுக என ஓபிஎஸ் உள்ளிட்டோர் சொல்லிக் கொண்டு பல்வேறு கூட்டங்களை கூட்டி வருகிறார்கள.
2019 ஆம் ஆண்டு முதல் நடந்த தேர்தல்களில் தோல்வியை அடைந்து வந்த அதிமுக தற்போது வெற்றி பெற வேண்டிய கட்டாயத்தில் இருக்கிறது. இந்த தோல்விக்கு எடப்பாடி பழனிசாமிதான் காரணம் என ஒபிஎஸ் தரப்பினர் சொல்லி வருகிறார்கள்.
இதனால் 2024 ஆம் ஆண்டு நாடாளுமன்றத் தேர்தலில் தனது செல்வாக்கை எப்படியாவது நிரூபிக்க வேண்டிய கட்டாயத்தில் எடப்பாடி இருக்கிறார். இதன் காரணமாக தமிழகம் முழுவதும் தொண்டர்களை சந்திக்க சுற்றுப்பயணம் செய்யும் வகையில் ஏற்பாடுகள் செய்யப்பட்டு வருகிறது.
இந்த நிலையில் எடப்பாடி பழனிசாமிக்கு கடந்த சில நாட்களாக காலில் பிரச்சினை ஏற்பட்டுள்ளது. இதற்காக சிறிய அறுவை சிகிச்சை செய்யப்பட்டுள்ளது. எனவே நீண்ட நேரமாக அவரால் ஒரே இடத்தில் நிற்க முடியாத நிலை உள்ளது. இதனால் சேலத்திலேயே அவர் 20 நாட்களுக்கு மேல் தங்கியிருந்து ஓய்வு எடுத்து வந்தார்.
சென்னை வந்த மத்திய அமைச்சர் அமித்ஷாவை பார்க்ககூட எடப்பாடி பழனிசாமியால் வர முடியாத நிலை இருந்தது. இதையடுத்து நீண்ட பயணங்களுக்கு எப்போதும் இன்னோவா மற்றும் டெம்போ டிராவலரை எடப்பாடி பழனிசாமி பயன்படுத்தி வந்தார். இந்த நிலையில் அதில் கால் வைக்க குறுகிய இடமாக இருப்பதாக புதிய வகை காருக்கு அவர் மாற திட்டமிட்டார்.
அதன்படி நேற்று சேலத்தில் நடந்த பொதுக்கூட்டத்தில் கலந்து கொள்ள வந்த எடப்பாடி பழனிசாமி ஃபோர்ஸ் நிறுவனத்தின் அர்பானியா வகை வாகனத்தை பயன்படுத்தினார். மேலும் நாடாளுமன்றத் தேர்தலுக்கு இன்னும் 8 மாதங்களே உள்ள நிலையில் தமிழகத்தின் பல்வேறு பகுதிகளில் சுற்றுப்பயணம் மேற்கொள்ள இருப்பதால் அதற்கு வசதியாக இந்த புதிய வாகனம் வாங்கப்பட்டுள்ளதாக கூறப்படுகிறது.
Click it and Unblock the Notifications
Sign in with Google