'இதுதான் எல்.முருகன் கொடுத்த இன்னோவா கார்.. வந்து நல்லா பாருங்க'- கோவை பாஜகவின் வைரல் போஸ்டர்

Updated: Thursday, August 26, 2021, 13:55 [IST]

Subscribe to Oneindia Tamil

கோவை: கட்சித் தலைமை பரிசாக அளித்த இன்னோவா காரை பார்வையிட வருமாறு பொதுமக்களிடம் பாஜக மாவட்ட தலைமை அழைப்பு விடுத்துள்ளது.

தமிழ்நாட்டில் கடந்த ஏப்ரல் மாதம் நடைபெற்ற தேர்தலில் அதிமுகவுடன் கூட்டணி அமைத்து பாஜக களமிறங்கியது. 10 ஆண்டுகளாக எதிர்க்கட்சியாக இருந்த திமுக இந்தத் தேர்தலில் 133 இடங்களில் வென்று தனிப்பெரும்பான்மையுடன் ஆட்சி அமைத்தது.

அதிமுக கூட்டணியில் இடம்பெற்றிருந்த 20 இடங்களில் களமிறங்கியது. அதில் 4 இடங்களில் வெற்றி வாகை சூடியது.

4 தொகுதிகளில் வெற்றி

இதன் மூலம் சுமார் 20 ஆண்டுகளுக்குப் பிறகு முதல்முறையாகத் தமிழ்நாடு சட்டசபையில் பாஜக நுழைந்தது. நாகர்கோவில் தொகுதியில் எம்ஆர் காந்தி, மொடக்குறிச்சி தொகுதியில் சிஆர் சரஸ்வதி, கோவை தெற்கு தொகுதியில் வானதி சீனிவாசன், திருநெல்வேலியில் நயினார் நாகேந்திரன் ஆகிய 4 பேரும் பாஜக சார்பில் வெற்றி பெற்றனர். இந்த வெற்றி தமிழக பாஜகவுக்கு புதிய உற்சாகத்தை அளித்துள்ளது.

எல் முருகன்

இந்த வெற்றியை அங்கீகரிக்கும் வகையில் பாஜகவின் மாநில தலைவராக இருந்த எல் முருகனுக்கு மத்திய இணை அமைச்சர் பதவி வழங்கப்பட்டது. பாஜக வேட்பாளர்களை வெற்றி பெற வைக்கும் மாவட்ட தலைவர்களுக்கு இன்னோவா கார் பரிசாக அளிக்கப்படும் என்று தேர்தல் பரப்புரை சமயத்திலேயே எல் முருகன் அறிவித்திருந்தார். இதனால் உற்சாகத்துடன் வேலை செய்த மாவட்ட தலைவர்கள், நான்கு தொகுதிகளில் பாஜகவின் வெற்றியைச் சாத்தியப்படுத்தினர்

கார்கள் பரிசளிப்பு

இதையடுத்து கடந்த ஆகஸ்ட் 22ஆம் தேதி ஈரோடு, திருநெல்வேலி, நாகர்கோவில், கோவை ஆகிய மாவட்டங்களின் மாவட்ட பாஜக தலைவர்களுக்கு இன்னோவா கார் வழங்கும் நிகழ்ச்சி நடைபெற்றது. சென்னை கமலாலயத்தில் நடைபெற்ற அந்த நிகழ்ச்சியில் மத்திய இணை அமைச்சர் எல் முருகன் கலந்து கொண்டு ஈரோடு, திருநெல்வேலி, நாகர்கோவில், கோவை ஆகிய மாவட்ட பாஜக தலைவர்களுக்கு இன்னோவா காரை பரிசாக அளித்தார்.

தொண்டர்களுக்கு அழைப்பு

இந்நிலையில், பரிசாக அளிக்கப்பட்ட இந்த இன்னோவா கார் கோவை மாவட்ட பாஜக அலுவலகத்தில் பொதுமக்களின் பார்வைக்கு வைக்கப்படுவதாக அறிவிக்கப்பட்டுள்ளது. இன்று மாலை 5 மணிக்குத் தொடங்கும் என்றும் இன்னோவா காரை பார்வையிட அனைத்து தொண்டர்களையும் அழைப்பதாக பாஜக மாவட்டத் தலைமை சமூக வலைத்தளங்களில் தொண்டர்களுக்கு அழைப்பு விடுத்துள்ளது. இது தற்போது இணையத்தில் வைரலாகியுள்ளது.