மோடி- அதானி முகமூடிகளுடன் காங்கிரஸ் எம்பிக்கள்..நாடாளுமன்ற வளாகத்தில் ராகுல் நடத்திய 'ஓரங்க நாடகம்'!

Updated: Monday, December 9, 2024, 16:57 [IST]

Subscribe to Oneindia Tamil

டெல்லி: நாடாளுமன்ற வளாகத்தில் இந்தியா கூட்டணி எம்பிக்கள் இன்றும் அதானி விவகாரத்தை முன்வைத்து போராட்டம் நடத்தினர். அதானி ஊழல் தொடர்பாக நாடாளுமன்ற கூட்டுக் குழு விசாரணை நடத்தக் கோரி நாள்தோறும் நாடாளுமன்ற வளாகத்தில் இந்தியா கூட்டணி எம்பிக்கள் தொடர் போராட்டம் நடத்துகின்றனர். இன்றைய போராட்டத்தின் போது மோடி- அதானி முகமூடி அணிந்த காங்கிரஸ் எம்பிக்களிடம் ராகுல் காந்தி கேள்விகள் மேல் கேள்விகளை கேட்டு அதகளப்படுத்தினார்.

நாடாளுமன்ற குளிர்கால கூட்டத் தொடர் தற்போது நடைபெற்று வருகிறது. இந்த கூட்டத் தொடரின் முதல் நாளில் இருந்தே அதானி ஊழல் தொடர்பாக நாடாளுமன்ற கூட்டுக் குழு விசாரணை நடத்த வேண்டும் என்பதை எதிர்க்கட்சிகள் வலியுறுத்தி வருகின்றன. நாடாளுமன்றத்தின் இரு சபைகளிலும் இந்த கோரிக்கையை எதிர்க்கட்சி எம்பிக்கள் முன்வைத்து அமளியில் ஈடுபடுவதும் பின்னர் சபை நடவடிக்கைகள் ஒத்திவைக்கப்படும் வழக்கமாகிவிட்டது. இன்றும் நாடாளுமன்றத்தின் இரு சபைகளும் பிற்பகலுக்கு மேல் நாள் முழுவதும் ஒத்திவைக்கப்பட்டன.

முன்னதாக இன்று காலை நாடாளுமன்ற வளாகத்தில் எதிர்க்கட்சி எம்பிக்கள் வழக்கம் போல அதானி விவகாரத்தை முன்வைத்து போராட்டம் நடத்தினர். இந்தப் போராட்டத்தின் போது காங்கிரஸ் எம்பிக்கள் மாணிக்கம் தாகூர், சப்தகிரி சங்கர் உலகா ஆகியோர் பிரதமர் மோடி மற்றும் அதானியின் உருவம் பொறித்த முகமூடிகளை அணிந்திருந்தனர்.

இப்போராட்டத்தில் இணைந்த லோக்சபா எதிர்கட்சித் தலைவர் ராகுல் காந்தி, மோடி-அதானி முகமூடி அணிந்த காங்கிரஸ் எம்பிக்களை போட்டோக்கள் எடுத்தார். பின்னர் செல்போனில் வீடியோ எடுத்த ராகுல் காந்தி, 'உங்க இருவருக்கும் என்ன தொடர்பு?' என மோடி- அதானியை கிண்டல் செய்யும் வகையில் கேள்விகளையும் கேட்டார். அதற்கு மோடி- அதானி முகமூடி அணிந்த காங்கிரஸ் எம்பிக்கள் இருவரும், நாங்கள் எதனைச் செய்தாலும் ஒன்றாகவே செய்வோம். எங்களிடையேயான உறவு பல ஆண்டுகளாக இருந்து வருகிறது' என கிண்டலாகப் பதிலளித்தனர்.

மேலும் நாடாளுமன்றம் ஏன் முடக்கப்பட்டுள்ளது எனவும் ராகுல் காந்தி கேள்வி கேட்க, மத்திய உள்துறை அமைச்சர் அமித்ஷா இன்று சபைக்கு வரவில்லை என கிண்டலடித்தனர். அத்துடன் அதானி முகமூடி அணிந்த எம்பியோ, நான் என்ன சொன்னாலும் அதை இவர் செய்வார் என மோடி முகமூடி அணிந்த எம்பியை சுட்டிக்காட்டி குறிப்பிட்டார். இந்த 'ஓரங்க நாடகம்' நாடாளுமன்ற வளாகத்தில் கலகலப்பை ஏற்படுத்தியது. இந்த ஓரங்க நாடக வீடியோவையும் சமூக வலைதளத்தில் பகிர்ந்துள்ளார் ராகுல் காந்தி