இன்னும் ரெண்டே வருஷம் தான்.. அமெரிக்காவுக்கு இணையா ரோடு.. பெட்ரோல் கார் விலையில் எலக்ட்ரிக் கார்..!

Updated: Tuesday, March 22, 2022, 20:52 [IST]

Subscribe to Oneindia Tamil

டெல்லி : இன்னும் இரண்டு வருடங்களில் பெட்ரோல் கார்களின் விலைக்கே எலக்ட்ரிக் கார்களும் கிடைக்கும் எனவும், 2024ஆம் ஆண்டு டிசம்பர் மாதத்திற்கு முன் இந்தியாவின் சாலை கட்டமைப்பு அமெரிக்காவை போல் இருக்கும் என்று உறுதியளிப்பதாக நெடுஞ்சாலை துறை அமைச்சர் நிதின் கட்கரி கூறியுள்ளார்

இந்தியாவில் காற்று மாசுபாட்டைக் குறைக்கும் பொருட்டு பல்வேறு நடவடிக்கைகள் எடுக்கப்பட்டு வருகின்றன. அந்த வகையில், மின் வாகன பயன்பாட்டை ஊக்குவிக்கும் முயற்சிகள் மேற்கொள்ளப்பட்டு வருகின்றன.

ஆனால் அதிகளவு சிலை, பராமரிப்பு, சர்வீஸ் செண்டர்கள், சார்ஜிங் மையங்கள் இல்லாதது உள்ளிட்ட நடைமுறை சிக்கல்கள் உள்ள நிலையில், இந்தியாவில் எலெட்ரிக் கார்கள் மற்றும் இருசக்கர வாகனங்களின் பயன்பாடு பெட்ரோல், டீசல் வாகனங்களை விட குறைவாகவே உள்ளது.

அமைச்சர் நிதின் கட்கரி

இந்நிலையில் இன்னும் இரண்டு வருடங்களில் பெட்ரோல் கார்களின் விலைக்கே எலக்ட்ரிக் கார்களும் கிடைக்கும் எனவும், 2024ஆம் ஆண்டு டிசம்பர் மாதத்திற்கு முன் இந்தியாவின் சாலை கட்டமைப்பு அமெரிக்காவை போல் இருக்கும் என்று உறுதியளிப்பதாக நெடுஞ்சாலை துறை அமைச்சர் நிதின் கட்கரி கூறியுள்ளார். 2022-23ஆம் ஆண்டுக்கான சாலைப் போக்குவரத்து மற்றும் நெடுஞ்சாலை அமைச்சகத்திற்கான மானிய கோரிக்கைகள் குறித்து மக்களவையில் பதிலளித்த கட்கரி, விலை குறைந்த உள்நாட்டு எரிபொருளுக்கு மாற வேண்டியதன் அவசியத்தை சுட்டிக்காட்டியதோடு, இந்த எரிபொருள் விரைவில் நடைமுறைக்கு வரும் என்றும், மாசு அளவைக் குறைக்கும் என்றும் கூறினார்.

எலக்ட்ரிக் கார் விலை

போக்குவரத்துக்கு ஹைட்ரஜன் தொழில்நுட்பத்தை பின்பற்றுமாறு எம்.பி.க்களை வலியுறுத்திய கட்கரி, அந்தந்த மாவட்டங்களில் கழிவுநீரை பச்சை ஹைட்ரஜனாக மாற்றுவதற்கு முன்முயற்சி எடுக்குமாறு கேட்டுக் கொண்டார். ஹைட்ரஜன் விரைவில் மலிவான எரிபொருள் மாற்றாக இருக்கும், என்ற அவர், அதிகபட்சம் இரண்டு ஆண்டுகளுக்குள், எலக்ட்ரிக் ஸ்கூட்டர், கார், ஆட்டோரிக்‌ஷா ஆகியவற்றின் விலை, பெட்ரோலில் இயங்கும் ஸ்கூட்டர், கார், ஆட்டோரிக்சஷா போன்றவற்றின் விலையிலேயே இருக்கும் என்றார். மேலும் லித்தியம் அயன் பேட்டரியின் விலை குறைகிறது.

சாலைகள் மேம்படும்

துத்தநாகம்-அயன், அலுமினியம்-அயன், சோடியம்-அயன் பேட்டரிகள் உருவாக்கப்பட்டு வருவதாகவும், பெட்ரோலுக்கு 100 ரூபாய் செலவழித்தால், மின்சார வாகனத்திற்கு 10 ரூபாய் தான் செலவிடுவீர்கள்,'' என்றார். அமெரிக்காவில் கட்டப்பட்ட சாலைகளை இந்தியாவில் உள்ள சாலைகளுடன் ஒப்பிட்டு, கட்காரி மேலும் கூறும் போது, இந்தியாவை செழிப்பாக மாற்ற, 2024 டிசம்பருக்கு முன் இந்தியாவின் சாலைகள் மேம்படும் என்று நான் உறுதியளிக்கிறேன். உள்கட்டமைப்பு அமெரிக்காவைப் போல இருக்கும்." என்றார்.

போக்குவரத்து நெரிசல்

மேலும், போக்குவரத்து நெரிசலைக் குறைக்கவும், மாசு பிரச்னையைச் சமாளிக்கவும் தேசிய தலைநகரில் ரூ.62,000 கோடி மதிப்பில் சாலைத் திட்டங்கள் மேற்கொள்ளப்பட்டுள்ளன என்ற மத்திய அமைச்சர் நிதின் கட்கரி, நெடுஞ்சாலை இணைப்பு மற்றும் சாலை உள்கட்டமைப்பில் முன்னேற்றம் ஏற்பட்டுள்ளதை எடுத்துரைத்ததோடு, டெல்லியில் இருந்து மீரட்டுக்கு பயணிக்க 40 நிமிடங்கள் மட்டுமே ஆகும் என்று கூறினார். கட்டுமானச் செலவைக் குறைத்து, தரத்தை மேம்படுத்துவதே எங்கள் நோக்கம் என்ற அவர், உள்கட்டமைப்பு மேம்பாட்டில் முன்னேற்றம் குறித்து கூறுகையில், டெல்லி - ஜெய்ப்பூர் இடையே சாலைப் பயணம்; மற்றும் டெல்லியில் இருந்து ஹரித்வாருக்கு இப்போது 2 மணி நேரம் ஆகும் என்றார்.