4ஆம் கட்ட லோக்சபா தேர்தல்.. இன்றுடன் பிரச்சாரம் ஓய்கிறது! களத்தில் உள்ள நட்சத்திர வேட்பாளர்கள் யார்!

டெல்லி: 4ஆம் கட்ட தேர்தல் நடைபெறும் 96 லோக்சபா தொகுதிகளில் இன்று மாலையுடன் பிரச்சாரம் நிறைவடைகிறது.

இந்தியாவில் மொத்தம் 7 கட்டங்களாக லோக்சபா தேர்தல் நடைபெறுகிறது. ஏற்கனவே 3 கட்ட தேர்தல் நடந்து முடிந்துவிட்ட நிலையில், இன்னும் நான்கு கட்ட தேர்தல் நடைபெற இருக்கிறது.

இந்தச் சூழலில் அடுத்த கட்டமாக வரும் திங்கள்கிழமை மே 13ஆம் தேதி 3ஆம் கட்ட லோக்சபா தேர்தல் நடைபெற உள்ளது. இதில் மொத்தம் 96 லோக்சபா தொகுதிகளுக்குத் தேர்தல் நடக்கும் நிலையில், அதற்கான பிரச்சாரம் இன்றுடன் நிறைவடைகிறது.

நிறைவு: இந்த 4ஆம் கட்ட தேர்தலில் பீகார், ஆந்திரா, தெலுங்கானா, மேற்கு வங்கம், உத்தரப் பிரதேசம், ஜார்கண்ட் உள்ளிட்ட 10 மாநிலங்களில் வாக்குப்பதிவு நடைபெறுகிறது. இத்துடன் ஆந்திர மாநிலத்திற்கான சட்டசபைத் தேர்தலும் நடைபெறுகிறது. இதற்கான பிரச்சாரம் இன்று மாலையுடன் நிறைவடைகிறது.

மே 13-ல் ஆந்திரா தேர்தல்: ஜெகன் ஆட்சி தொடருமா? தங்கை ஷர்மிளா வீழ்த்திவிடுவாரா? மீள்வாரா 'நாயுடு'?


இந்த 4ஆம் கட்டத்தில் 10 மாநிலங்களில் உள்ள மொத்தம் 96 மக்களவைத் தொகுதிகளுக்குத் தேர்தல் நடைபெறுகிறது. ஆந்திரப் பிரதேசத்தில் 25 தொகுதிகள், பீகார் 5 தொகுதிகள், ஜம்மு காஷ்மீர் ஒரு தொகுதி, ஜார்கண்ட் 4 தொகுதிகள், மத்தியப் பிரதேசம் 8 தொகுதிகள், மகாராஷ்டிரா 11 தொகுதிகள், ஒடிசா 4 தொகுதிகள், தெலுங்கானா 17 தொகுதிகள், உத்தரப் பிரதேசம் 13 தொகுதிகள், மற்றும் மேற்கு வங்கத்தில் 8 தொகுதிகளில் திங்கள்கிழமை வாக்குப்பதிவு நடக்கிறது

நட்சத்திர வேட்பாளர்கள்: இதில் மொத்தம் 1,717 வேட்பாளர்கள் களத்தில் உள்ளனர்... இதில் அகிலேஷ் யாதவ் (உத்தரப் பிரதேசம்), மஹுவா மொய்த்ரா (மேற்கு வங்கம்) கிரிராஜ் சிங் (பீகார்) ஒய்.எஸ்.சர்மிளா (ஆந்திரப் பிரதேசம்), சத்ருகன் சின்ஹா (மேற்கு வங்காளம்), ஓவைசி(தெலுங்கானா) என பல நட்சத்திர வேட்பாளர்கள் களத்தில் உள்ளனர்.

ஆந்திர தேர்தல்: 4ஆம் கட்ட தேர்தலுடன் ஆந்திராவில் சட்டசபைத் தேர்தலும் நடைபெறுகிறது. அங்கு ஆளும் ஜெகன்மோகன் ரெட்டி ஆட்சியைத் தக்கவைக்கப் போட்டியிடுகிறார். அதேநேரம் அவருக்கு எதிராக சந்திரபாபு நாயுடு, பாஜக மற்றும் பவன் கல்யாண் உடன் கூட்டணி அமைத்துக் களமிறங்குகிறார். இது தவிர காங்கிரஸ் சார்பில் ஒய்.எஸ்.சர்மிளாவும் பிரச்சாரத்தை முன்னெடுக்கும் நிலையில், அங்கு மும்முனை போட்டி நிலவுகிறது.

இந்த 96 லோக்சபா தொகுதிகளில் வரும் திங்கள்கிழமை வாக்குப்பதிவு நடைபெறும் நிலையில், அந்தத் தொகுதிகளில் இன்று மாலையுடன் பிரச்சாரம் நிறைவடைகிறது.

English summary

Lok Sabha Elections Phase 4 total of 96 consistencies are going for poll Monday: Lok Sabha election latest news in tamil.