பீகார் தேர்தல் முடிந்த ஒரே வாரம்.. நவம்பர் 19ல் கோவை வரும் பிரதமர்.. வேளாண் மாநாட்டில் பங்கேற்பு?

டெல்லி: நவம்பர் 19ஆம் தேதி பிரதமர் நரேந்திர மோடி தமிழ்நாடு வர உள்ளதாக தகவல் வெளியாகி இருக்கிறது. கோவையில் நடைபெறும் வேளாண் கூட்டமைப்பு மாநாட்டில் பிரதமர் மோடி பங்கேற்க உள்ளதாகவும் கூறப்படுகிறது. கடைசியாக ஜூலை கடைசி வாரத்தில் பிரதமர் மோடி தமிழ்நாடு வந்திருந்த நிலையில், தற்போதைய பயணம் பாஜகவினர் மத்தியில் எதிர்பார்ப்பை ஏற்படுத்தியுள்ளது.

பீகார் மாநிலத்தில் இரு கட்டங்களாகச் சட்டசபைத் தேர்தல் நடைபெற்றது. நவம்பர் 6ஆம் தேதி நடைபெற்ற முதற்கட்ட வாக்குப்பதிவில் 121 தொகுதிகளுக்கும், நேற்று 2ஆம் கட்ட வாக்குப்பதிவில் 122 தொகுதிகளிலும் தேர்தல் நடந்தது. மொத்தமாக பீகார் சட்டசபைத் தேர்தலில் 66.91 சதவிகித வாக்குகள் பதிவாகி இருக்கிறது. ஆண்களை விடவும் பெண்களே அதிகளவில் வாக்களித்துள்ளனர்.

இந்த தேர்தலில் என்டிஏ கூட்டணிக்கு சாதகமாக தேர்தலுக்கு பிந்தைய கருத்துக் கணிப்புகள் வெளியாகி வருகின்றன. இதனால் பாஜகவினர் உற்சாகத்தில் உள்ளனர். மீண்டும் பீகாரில் பாஜக கூட்டணி ஆட்சி அமையும் பட்சத்தில், அது அடுத்தடுத்த தேர்தல்களில் எதிரொலிக்கும் என்று அக்கட்சியினர் நம்புகின்றனர்.

இதனிடையே பீகார் தேர்தல் முடிவடைந்த சூழலில், பாஜகவின் பார்வை தமிழ்நாடு பக்கம் திரும்பி இருக்கிறது. இந்த நிலையில் நவம்பர் 19ஆம் தேதி பிரதமர் நரேந்திர மோடி ஒரு நாள் பயணமாக தமிழ்நாடு வர உள்ளதாக தகவல் வெளியாகி இருக்கிறது. கோவையில் நடக்கும் வேளாண் கூட்டமைப்பு மாநாட்டில் பிரதமர் மோடி பங்கேற்க உள்ளதாக கூறப்படுகிறது.

இந்த வேளாண் கூட்டமைப்பு மாநாட்டில் பல்வேறு விவசாய சங்கங்கள், பிரதிநிதிகள் பங்கேற்க உள்ளனர். சுமார் ஒரு மணி நேரம் பிரதமர் நரேந்திர மோடி பங்கேற்க உள்ளதாக சொல்லப்படுகிறது. சட்டசபைத் தேர்தல் நெருங்கிவிட்ட நிலையில், இனி வரும் காலங்களில் பிரதமர் மோடி, மத்திய அமைச்சர் அமித்ஷா உள்ளிட்டோரின் வருகை தொடர்ச்சியாக இருக்கும் என்று பார்க்கப்படுகிறது.

கடைசியாக பிரதமர் மோடி ஜூலை மாதம் தூத்துக்குடி மற்றும் அரியலூர் மாவட்டங்களுக்கு வந்தார். அதன்பின் மீண்டும் பிரதமர் மோடி கோவை வரவிருப்பது பாஜகவினர் மத்தியில் எதிர்பார்ப்பை ஏற்படுத்தி இருக்கிறது. கோவையில் பாஜக வலிமையாக இருக்கும் சூழலில், பிரதமர் மோடியின் பயணம் கூடுதல் உற்சாகத்தை கொடுக்கும் என்று நம்பப்படுகிறது.

English summary

PM Modi Visit: Prime Minister Narendra Modi is scheduled to visit Tamil Nadu on November 19. It is also said that Prime Minister Modi will participate in the Agriculture Federation Conference to be held in Coimbatore.