அடுத்தகட்ட வேட்பாளர் பட்டியல்.. தமிழகத்தில் களமிறங்கப்போவது யார்? முழுவீச்சில் தயாராகும் காங்கிரஸ்

டெல்லி: லோக்சபா தேர்தல் நெருங்கும் நிலையில், காங்கிரஸ் கட்சியின் மத்திய தேர்தல் குழுவின் இரண்டாவது கூட்டம் இன்று டெல்லியில் நடைபெறுகிறது. இந்த கூட்டத்திற்கு பின்னர் இரண்டாம் கட்ட வேட்பாளர் பட்டியல் வெளியாக வாய்ப்பிருக்கிறது.

இந்த லோக்சபா தேர்தல் காங்கிரஸ் கட்சிக்கு சவாலானதாக இருக்கிறது. எனவே இதனை எதிர்கொள்ள, இந்தியா கூட்டணியை உருவாக்கி மாநில கட்சிகளுடன் கூட்டணியை உறுதி செய்திருக்கிறது. இதனையடுத்து கடந்த 7ம் தேதியன்று காங்கிரஸ் கட்சியின் மத்திய தேர்தல் குழுவின் முதல் கூட்டம் டெல்லியில் நடைபெற்றது. இதற்கு அடுத்த நாள் காங்கிரஸ் கட்சி தனது முதல் வேட்பாளர் பட்டியலை வெளியிட்டது.

சத்தீஸ்கர், கர்நாடகா, கேரளா, லட்சத்தீவு, மேகாலயா, நாகாலாந்து, சிக்கிம், தெலங்கானா, திரிபுரா ஆகிய மாநிலங்களில் போட்டியிடும் 39 வேட்பாளர்கள் அறிவிக்கப்பட்டனர். இவர்களில் 16 பேர் கேரளாவிலிருந்தும், 7 பேர் கர்நாடகாவில் இருந்தும், 6 பேர் சத்தீஸ்கரில் இருந்தும், 4 பேர் தெலுங்கானாவிலிருந்தும் அறிவிக்கப்பட்டனர். அதேபோல மேகாலயாவில் இருவர், நாகாலாந்து, சிக்கிம், லட்சத்தீவு, திரிபுரா ஆகிய மாநிலங்களிலிருந்து ஒருவர் வேட்பாளர் பட்டியலில் இடம் பெற்றிருந்தனர்.

இந்த 39 வேட்பாளர்களில் 15 பேர் பொதுப்பிரிவை சேர்ந்தவர்கள், 24 பேர் எஸ்சி, எஸ்டி, OBC மற்றும் சிறுபான்மையினராவார்கள். இந்த பட்டியலில் போட்டியிடும் அனைவரும் வெற்றி வாய்ப்புள்ள தொகுதிகளில் களமிறங்கப்பட்டிருப்பதாக அரசியல் விமர்சகர்கள் கூறியுள்ளனர்.

இந்நிலையில், இன்று கட்சியின் மத்திய மத்திய தேர்தல் குழுவின் இரண்டாவது கூட்டம் நடைபெறுகிறது. காங்கிரஸ் தலைவர் மல்லிகார்ஜுன கார்கே தலைமையில் நடைபெறும் இந்த கூட்டத்தில் சோனியா, ராகுல் காந்தி உள்ளிட்ட முக்கிய தலைவர்கள் பங்கேற்கின்றனர். இந்த கூட்டத்தை தொடர்ந்து இரண்டாம் கட்ட வேட்பாளர்கள் பட்டியல் வெளியாகலாம் என்று எதிர்பார்க்கப்படுகிறது.

முன்னதாக காங்கிரஸ் கட்சியின் தேர்தல் அறிக்கை குறித்து பேசிய காங்கிரஸ் எம்பி ஜெய்ராம் ரமேஷ், "எங்களிடம் தனியார் தேர்தல் அறிக்கை கிடையாது. ஆனால், 'பஞ்ச் நியாய்' இருக்கிறது. அதாவது இது ஒட்டுமொத்த இந்தியா கூட்டணிக்கான செயல்திட்டமாகும். அதேபோல பலரும் இந்தியா கூட்டணியின் பிரதமர் வேட்பாளர் யார் என்று கேட்கிறார்கள். நாங்கள் கொள்கை, சித்தாந்தத்தின் அடிப்படையில்தான் தேர்தலை சந்திக்கின்றோமே தவிர, ஒரேயொரு முகத்தை காட்டி அல்ல" என்று கூறியிருந்தார் என்பது குறிப்பிடத்தக்கது.

English summary

As the Lok Sabha elections are approaching, the second meeting of the Central Election Committee of the Congress Party is being held in Delhi today. The list of candidates for the second phase is likely to be released after this meeting.